Ministerstva abarony Biełarusi pryznała fakt praviadzieńnia na terytoryi krainy sumiesnych vučeńniaŭ z vajskovaj avijacyjaj Rasii. Niekalkimi hadzinami raniej načalnik upraŭleńnia infarmacyi hałoŭnaha ŭpraŭleńnia ideałahičnaj raboty vajskovaha viedamstva Uładzimir Makaraŭ zajaŭlaŭ, što jamu ničoha nie viadoma pra toje, što na minułym tydni na aeradromie 61-j źniščalnaj avijabazy znachodzilisia rasijskija vajskovyja samaloty, a ŭ rajonie Baranavičaŭ pravodzilisia vučeńni.
«U VPS i vojskach SPA Respubliki Biełaruś zaviaršyŭsia etap sumiesnaj kamandna-štabnoj treniroŭki pa kiravańni avijacyjaj i vajskovymi čaściami supraćpavietranaj abarony, jakija ŭvachodziać u Adzinuju rehijanalnuju sistemu supraćpavietranaj abarony Respubliki Biełaruś i Rasijskaj Fiederacyi, — havorycca ŭ paviedamleńni pres-słužby Minabarony. — U treniroŭcy pryniali ŭdzieł samaloty Su-27 i Su-34 Pavietrana-kaśmičnych sił Rasijskaj Fiederacyi».
Jak adznačajecca ŭ paviedamleńni, «mierapryjemstva źjaŭlajecca płanavym i daść mahčymaść pavysić uzrovień padrychtoŭki kirujučaha składu VPS i vojskaŭ SPA Respubliki Biełaruś i Pavietrana-kaśmičnych sił Rasijskaj Fiederacyi pa kiravańni padnačalenymi złučeńniami i vajskovymi čaściami, a taksama zładžanaść sumiesnych dziejańniaŭ lotnych ekipažaŭ dźviuch krain».
U ciapierašni čas praciahvajecca druhi etap treniroŭki, u jakim udzielničaje avijacyja VPS i vojskaŭ SPA Biełarusi, paviedamiła Minabarony.
Ab prylocie ŭ Baranavičy Su-34 i vučeńniach, jakija pravodzilisia ź biełaruskaj vajskovaj avijacyjaj padčas bujnych manieŭraŭ NATA ŭ Polščy, paviedamiŭ intex-press.by.
