Najbujniejšy vytvorca sielskahaspadarčaj techniki AAT «Homsielmaš» adpravić 90% svaich pracaŭnikoŭ u adpačynak na ŭvieś nastupny tydzień. Kopijaj zahadu hiendyrektara pradpryjemstva vałodaje redakcyja finance.tut.by.
Zavodu akazałasia bolš vyhadna adpuścić ludziej dadomu i płacić 2/3 akładu, čym «imitavać» pracu cechaŭ: rabotnikam prosta niama čaho rabić. Vydatki na aśviatleńnie i aciapleńnie pustych pamiaškańniaŭ, pa padlikach ekanamistaŭ pradpryjemstva, paciahnuli b bolš.
«Rašeńnie pryniata ŭ suviazi z adsutnaściu materyjalnych resursaŭ, pierš za ŭsio kamplektujučych — tłumačyć staršynia prafsajuznaha kamiteta AAT «Homsielmaš» Piotr Achromienka. — Tamu i arhanizacyja pracy pakul što niemahčymaja faktyčna va ŭsich cechach».
Ciapier u pradpryjemstva niama vyručki i šmat daŭhoŭ.
«Z-za vielizarnaj debitorskaj zapazyčanaści — kala 150 miljonaŭ dołaraŭ - my taksama nie možam z abaviazkami raźličycca. Kali b nam viarnuli hrošy za techniku choć by na tracinu, to była b zusim inšaja situacyja», — udakładniaje Piotr Achramienka.
U adpačynak pojduć prykładna 90% piersanału zavoda. Heta prykładna 13 tysiač čałaviek, bo pa ŭsim chołdynhu (razam z AAT «Homielski zavod lićcia i narmalej») pracuje bolš za 15 tysiač. Jak kažuć u prafsajuznym kamitecie, spačatku byli prapanovy adpravić ludziej dadomu biez ŭtrymańnia. «Ale my damahlisia, kab usim zachavali 2/3 akładu».
Jašče 10% rabotnikaŭ buduć pracavać, bo jość vytvorčaści, jakija nielha pakidać biez nahladu. Heta, naprykład, abjekty Pramatamnahladu: kacielnia, cech sietak padstancyj i inšyja. Akramia taho, na pracu vyjdzie achova. Taksama buduć pracavać zabieśpiačenskija słužby i aktyŭna šukać kamplektujučyja, kab 14 sakavika ludzi mahli viarnucca ŭ cechi.
Darečy, heta nie pieršyja «kanikuły» Homsielmaša ŭ 2016 hodzie. U studzieni ludzi vyjšli na pracu tolki 11-ha, «bo my vielmi zaležym ad pastaŭščykoŭ z Rasijskaj Fiederacyi, a ŭ ich byli vialikija vychodnyja». Nahadajem, što doŭha «śviatkavali» Novy hod i na mnohich inšych pradpryjemstvach.
