Rost taryfaŭ praduhledžany prajektam Dziaržaŭnaj prahramy raźvićcia transpartnaha kompleksu Biełarusi na 2016—2020 hady, jaki pa daručeńni ŭrada raspracavała Ministerstva transpartu i kamunikacyj.
«Hety dakumient praduhledžvaje pastupovaje daviadzieńnie da 2020 hoda taryfaŭ da ŭzroŭniu, jaki b zabiaśpiečvaŭ pavyšeńnie ekanamičnaj efiektyŭnaści pasažyrskich transpartnych pasłuh», — havorycca ŭ artykule namieśnika načalnika ŭpraŭleńnia finansaŭ žyllova-kamunalnaj haspadarki, transpartu i suviazi Minfina Haliny Pranovič, apublikavanym u apošnim numary časopisa «Finansy, učiet, audit», što vydajecca ministerstvam.
Pavysić akupnaść pasažyrskich pieravozak płanujecca taksama za košt źnižeńnia zatrat na ich.
Pradstaŭnik Minfina kanstatavała, što taryfnaja palityka, jakaja siońnia prymianiajecca dziaržavaj, nakiravana na strymlivańnie cen na pasažyrskija pieravozki ŭ paraŭnańni ź ich realnym koštam.
«U vyniku transpartnyja arhanizacyi respubliki za košt atrymanaj vyručki ad prodažu svaich pasłuh nasielnictvu kampiensujuć paniesienyja zatraty tolki častkova: za 2014 hod pakazčyk skłaŭsia na ŭzroŭni 58% raschodaŭ, u 2015 hodzie (pa acency) składzie kala 62%. Astatniaja suma pakryvajecca za košt biudžetu», — zaznačaje Pranovič.
Pavodle źviestak Minfina, pradastaŭleńnie nasielnictvu pasažyrskich transpartnych pasłuh patrabuje ad dziaržavy adšukańnia značnych finansavych resursaŭ. «Razam z tym ekanamičnaja palityka Respubliki Biełaruś nakiravana na skaračeńnie biudžetnych raschodaŭ, u tym liku halinovych, jakija majuć sacyjalnuju skiravanaść», — padkreślivaje Pranovič.
