Urad zaćvierdziŭ stratehiju abychodžańnia z radyjeaktyŭnymi adchodami Biełaruskaj AES, jakaja budujecca ŭ Astraŭcy (Hrodzienskaja vobłaść).
Adpaviednaja pastanova Savieta ministraŭ № 460 apublikavanaja 6 červienia na Nacyjanalnym pravavym internet-partale.
Jak zaznačajecca ŭ tekście Stratehii, u suviazi z ekspłuatacyjaj atamnaj elektrastancyi asablivuju aktualnaść nabyvaje prablema stvareńnia roznych typaŭ i katehoryj radyjeaktyŭnych adchodaŭ (RAA), jakija ŭjaŭlajuć patencyjalnuju niebiaśpieku dla čałavieka i navakolnaha asiarodździa.
U adpaviednaści z prajektam BiełAES praduhledžvajucca funkcyjanavańnie sistemy abychodžańnia z RAA i ich zachoŭvańnie ŭ prystancyjnym schoviščy na praciahu dziesiaci hadoŭ z nastupnym ich pieramiaščeńniem u punkt pachavańnia RAA, pabudova jakoha prajektam nie praduhledžana.
Adkaznaść za zabieśpiačeńnie biaśpiečnaha i nadziejnaha funkcyjanavańnia sistemy abychodžańnia z RAA ŭskładajecca na dziaržavu i arhanizacyju, jakaja jaje ekspłuatuje.
Sistema abychodžańnia z RAA ŭklučaje ŭ siabie zbor, sarciroŭku, ačystku, pierapracoŭku, kandycyjanavańnie, transparciroŭku i zachoŭvańnie RAA, jakija ŭtvarajucca ŭ pracesie ekspłuatacyi atamnaj elektrastancyi.
Pry ekspłuatacyi atamnaj elektrastancyi ŭtvarajucca RAA roznych typaŭ (hazapadobnyja, vadkija i ćviordyja) i katehoryj (vielmi nizkaaktyŭnyja, nizkaaktyŭnyja, siarednieaktyŭnyja i vysokaaktyŭnyja).
U metach biaśpiečnaha abychodžańnia z RAA ŭ miežach realizacyi prajekta nieabchodna vyrašyć pytańni ačystki RAA pierad vykidam u atmaśfieru da stanu, jaki b adpaviadaŭ sanitarnym normam, — pry abychodžańni z hazapadobnymi RAA; ačystki RAA ad radyjenuklidaŭ, kancentravańnia radyjenuklidaŭ u minimalnym abjomie i pieravodu vadkich kancentravanych RAA ŭ formy, zručnyja dla zachoŭvańnia, — pry abychodžańni z vadkimi RAA; minimizacyi abjomaŭ RAA i ich biaśpiečnaha i nadziejnaha zachoŭvańnia na praciahu prajektnaha terminu ekspłuatacyi atamnaj elektrastancyi — pry abychodžańni ź ćviordymi RAA.
Zhodna z dakumientam, na praciahu terminu ekspłuatacyi atamnaj elektrastancyi (60 hadoŭ) prahnazujecca ŭtvareńnie 9360 kub. mietraŭ ćviordych RAA roznych katehoryj i 60 kub. mietraŭ vysokaaktyŭnych RAA.
Zhodna z papiaredniaj acenkaj, prahnazujemy abjom ŭtvarajemych nizkaaktyŭnych i siarednieaktyŭych ćviordych RAA ŭ vyniku vyvadu AES z ekspłuatacyi składaje 2.050 kub. mietraŭ na adzin enierabłok atamnaj elektrastancyi, vysokaaktyŭnych ćviordych RAA — 85 kub. mietraŭ.
«Z ulikam čakanych abjomaŭ utvareńnia RAA isnuje abjektyŭnaja nieabchodnaść stvareńnia punkta pachavańnia RAA dla zabieśpiačeńnia biaśpiečnaha zachoŭvańnia vielmi nizkaaktyŭnych, nizkaaktyŭnych i siarednieaktyŭnych RAA paśla ŭvodu atamnaj elektrastancyi ŭ ekspłuatacyju. Budaŭnictva hetaha punkta pachavańnia metazhodna ažyćciavić z vykarystańniem prypavierchnievaha sposabu łakalizacyi adchodaŭ z mahčymaściu jaho pašyreńnia dla zabieśpiačeńnia pachavańnia RAA, što ŭtvarajucca pry vyvadzie atamnaj elektrastancyi z ekspłuatacyi», — havorycca ŭ Stratehii.
Zaznačajecca, što ŭ skład punkta pachavańnia RAA mohuć być uklučany śpiecyjalna abstalavanyja adsieki dla praciahłaha zachoŭvańnia ŭpakovak siarednieaktyŭnych RAA, kolkasnaje ŭtrymańnie doŭhažyvučych radyjenuklidaŭ u jakich nie dapuskaje ich prypavierchnievaha pachavańnia ŭ adpaviednaści z narmatyŭnymi patrabavańniami. Aprača taho, nieabchodna prapracavać pytańnie ab pabudovie punkta pachavańnia vysokaaktyŭnych RAA ŭ hłybokaj hieałahičnaj farmacyi paśla vyvadu atamnaj elektrastancyi z ekspłuatacyi.
Abjom finansavych srodkaŭ dla budaŭnictva punkta pachavańnia RAA, acenka jakoha zroblena pa košcie pabudovy anałahičnaha abjekta ŭ Litoŭskaj Respublicy (mohilnik radyjeaktyŭnych adchodaŭ Ihnalinskaj AES), składaje kala 60 młn. dołaraŭ ZŠA. Acenačny košt budaŭnictva abjektaŭ pieršaj čarhi punkta pachavańnia RAA składaje 10 młn. dołaraŭ ZŠA. Košt pabudovy zhadanych abjektaŭ budzie vyznačany pa vynikach raspracoŭki adpaviednaha prajekta.
Biełaruskaja AES budujecca prykładna za 20 kiłamietraŭ ad Astraŭca pa prajekcie rasijskaj kampanii «Atambudekspart». Hienieralnym prajekciroŭščykam i padradčykam vystupaje rasijskaja kampanija AAT «NDAEP» — ZAT «ASE». Stancyja budzie składacca z dvuch enierhabłokaŭ sumarnaj mahutnaściu da 2.400 MVt. Uvod u ekspłuatacyju pieršaha błoka zapłanavany na listapad 2018 hoda, druhoha — na lipień 2020-ha.
