Jašče niadaŭna my hladzieli na robata-hanhstara ŭ kino, a chutka zmožam pasłuchać robata-repiera ŭ žyćci. Kadr ź filma «Čapi»
Finskija navukoŭcy stvaryli ałharytm DeepBeat dla napisańnia tekstaŭ u styli rep. Svaju rabotu jany apublikavali na arxiv.org, prykłady hatovych tekstaŭ vykłali asobnym archivam.
Ałharytm umieje kambinavać viadomyja słovy i frazy, što sustrakajucca ŭ 11 tysiačach praanalizavanych kampazicyj, składać teksty na zadadzienuju tematyku i padbirać składanyja ryfmy.
Kampjutar moža padbirać nie tolki ryfmy ŭzroŭniu «pytaju-siadaju». Ryfma moža raściahvacca na niekalki słoŭ, mohuć vykarystoŭvacca asanansnyja ryfmy. Naprykład, kampjutar zaryfmavaŭ radki «But hey maybe I'll never win // Stressing me – stressing me, my memories».
Prykład zaryfmavanaha tekstu:
«You've been a survivor and we love you so much
You don't know me - I kill everyone who show love
I know you all love me to be sad and shit but
Will lead you to peace to love to unity and havin' fun»
Ź viadomych radkoŭ adkidalisia zyčnyja litary — ryfmy šukalisia pa hałosnych hukach. Vyłučałasia kančatkovaja ryfma, rytm, daŭžynia radka i inšyja charaktarystyki. Rep byŭ abrany jak žanr, jaki najbolš abapirajecca na rytm tekstaŭ i najlahčej paddajecca paramietryzacyi.
Padčas daśledavańnia byŭ vyznačany paramietr «zaryfmavanaści» tekstaŭ — nakolki častyja i doŭhija ryfmy ŭ tekstach. Pavodle jaho ŭ topie akazalisia małaviadomyja ŭ nas vykanaŭcy. Pieršaje miesca zaniaŭ Inspektah Deck (pakaźnik zaryfmavanaści 1,187), słavuty 2Pac ža zaniaŭ tolki 33 miesca (1,054), a Eminem — 39-je (1,0147). Kampjutar značna pierahnaŭ žyvych repieraŭ, zaryfmavaŭšy tekst na pakaźnik 1,431.
U dalejšych płanach navukoŭcaŭ udaskanaleńnie ałharytmu ŭ łahičnaj źviazanaści radkoŭ u cełyja historyi dy stvareńnie hałasavoha sintezataru dla začytvańnia tekstaŭ. Pra napisańnie muzyki ŭ inšych žanrach navukoŭcy pakul ničoha nie kažuć.
