Na piaty dzień haładoŭki šaści žycharoŭ vysielenaha doma pradstaŭniki mahiloŭskich uładaŭ inicyjavali sustreču z udzielnikami akcyi pratestu.
Nahadajem, 18 maja šeść žycharoŭ vysielenaha doma pa vulicy Leninskaj, 59, abjavili haładoŭku pratestu z patrabavańniem viartańnia im asobnaha žylla. Jany sprabujuć dakazać, što žyli ŭ žyłym domie, a nie ŭ internacie. Pa pryčynie staraści pabudovy jany byli pierasielenyja ŭ internat pa vulicy Pijanierskaj. Jak śćviardžajuć žychary, u ich na rukach ordery, vydadzienyja ŭ 1970-ch hadach, dzie ŭkazvajecca, što jany atrymali mienavita kvatery ŭ šmatkvaternym žyłym domie. Haradskija ž ułady ličać, što stary dom byŭ internatam, i tamu na asobnyja kvater žychary prava nie majuć. Hramadzianie źviarnulisia ŭ abłasnuju prakuraturu i zajavili pra hatoŭnaść abjavić haładoŭku. U sakaviku nahladnaje viedamstva admoviła im u pravie na asobnyja kvatery, staŭšy na bok haradskich uładaŭ. Vysielenyja žychary, u svaju čarhu, zajavili pra padłoh dakumientaŭ. Na druhi dzień haładoŭki da adnoj ź jaje ŭdzielnic pryjazdžała chutkaja dapamoha.
Siońnia ŭ 15.00 u internacie, dzie žyvuć udzielniki akcyi, namiečana sustreča ź imi namieśnikaŭ staršyni Mahiloŭskaha harvykankama Andreja Kunceviča i Siarhieja Dziadoviča. U joj taksama voźmie ŭdzieł pradstaŭnik abłasnoha ŭpraŭleńnia ŽKH. Infarmacyju pra heta paćvierdziŭ BiełaPAN Andrej Kuncevič. «My chočam pasłuchać ludziej. Haładoŭka — heta nie vyrašeńnie prablemy. U nas pravavaja dziaržava, i kali niejkija sprečnyja pytańni ŭźnikajuć, to jany pavinny vyrašacca vyklučna ŭ pravavym poli, a nie siłaj i naciskam», — zajaviŭ jon.
«Skazali, što chočuć pryjści da nas dla pieramoŭ», — paviedamiła adna z udzielnic haładoŭki Natalla Kastahładava, adznačyŭšy, što samaadčuvańnie va ŭsich usio bolš paharšajecca. «Usim usio horš i horš stanovicca. Užo ad vady nudzić pačynaje, a vyniku nijakaha — nichto nie choča cikavicca. Choć siońnia prajavili niejki ruch», — skazała jana.
Adznačym, što ŭčora aktyvisty niezaležnaha prafsajuza REP stvaryli hrupu maralnaj padtrymki ŭdzielnikaŭ haładoŭki. Pavodle słoŭ Kastahładavaj, haładoŭščyki adčuvajuć ad ich uvahu i dapamohu.
