Pra heta pišuć u sacyjalnych sietkach. Supołka «Biełaruś i Rasija razam nazaŭždy! Ruś maładaja!» paviedamlaje: «Adnadumcy, što chočuć pryniać udzieł u štohodavaj akcyi Hieorhijeŭskaja stužka, a taksama tyja, chto choča atrymać stužki biaspłatna, pišycie Siarhieju Łušču».
Siarhiej Łušč – heta lidar «Rumoła». Palitołah Ihar Lalkoŭ u materyjale ab prarasijskich siłach u Biełarusi adznačaŭ: «Siarhiej Łušč maje vydatnyja adnosiny jak ź biełaruskimi ŭładami (pa linii «aficyjnaj moładzievaj palityki»), tak i z pasolstvam RF u Minsku (pa linii Rassupracoŭnictva, praviadzieńnia raznastajnych kanfierencyjaŭ, spartovych turniraŭ pa karate i h.d.)».
Adznačajecca, što 6 maja pa adrasie Kamunistyčnaja, 86 (uvachod źleva ad hałoŭnaha) a 16 hadzinie adbudziecca kaardynacyjny schod. Sama akcyja adbudziecca 7-8 maja.
Niekalki dzion tamu na sajcie «Rusi maładoj» źjaviŭsia materyjał «Naviny ab zabaronie hieorhijeŭskich stužak u Biełarusi i Kazachstanie – fejk» za aŭtarstvam Siarhieja Łušča.
«Vidavočna, što dadzieny ŭkid ŭ duchu spadčyńnikaŭ hiebielsaŭskaj prapahandy, jaki vyjšaŭ na staronkach žoŭtaha apazicyjnaj internet-sajta, dzie Rasiju nazyvajuć nie inakš jak ahresaram, a žycharoŭ Danbasa - terarystami, nielha ŭsprymać u cełym jak niešta adekvatnaje», – napisaŭ Łušč.
Varta adznačyć, što z hetaha hoda na aficyjnych mierapryjemstvach u Biełarusi vykarystoŭvajucca stužki ŭ koler dziaržaŭnaha ściaha ź jabłynievym ćvietam. Hety simvał prapanavali na studzieńskim źjeździe BRSM, jaho padtrymaŭ Łukašenka. Nichto z čynavienstva nie prymacoŭvaje da svajho adzieńnia hieorhijeŭskuju stužku.
Paśla taho, jak bajeviki na Uschodzie stali vykarystoŭvać hieorhijeŭskuju stužku dla ŭłasnaj identyfikacyi, jana nabyła inšy sens, pierastaŭšy być niejtralnym simvałam.
