Hałoŭnaja vajskovaja prakuratura Polščy pradjaviła abvinavačvańni dvum dyśpietčaram aeraporta Smalenska pa spravie ab katastrofie samalota Tu-154 u krasaviku 2010 hoda.
Samalot raźbiŭsia pry zachodzie na pasadku na aeradrom «Paŭnočny» 10 krasavika 2010 hoda. Usie 96 čałaviek, jakija znachodzilisia na borcie, uklučajučy prezidenta Polščy Lecha Kačyńskaha, zahinuli.
«Pradjaŭlenyja abvinavačvańni dvum rasijskim dyśpietčaram u nienaŭmysnym daviadzieńni da avijacyjnaha zdareńnia. My majem namier zasłuchać ich u jakaści padazravanych», — zajaviŭ aficyjny pradstaŭnik hałoŭnaj vajskovaj prakuratury Polščy.
Ekśpierty Miždziaržaŭnaha avijacyjnaha kamiteta (MAK), jakija pravodzili rasśledavańnie, uskłali adkaznaść za trahiedyju na polski ekipaž. (MAK — vykanaŭčy orhan dziaržaŭ byłoha SSSR (SND) pa delehavanych dziaržavami funkcyjach i paŭnamoctvach u halinie hramadzianskaj avijacyi i vykarystańnia pavietranaj prastory. Jaho štab-kvatera znachodzicca ŭ Maskvie)
U 2011 hodzie polski ŭrad apublikavaŭ dakład, zhodna ź jakim za katastrofu niasuć adkaznaść mała i drenna treniravanyja polskija piłoty, kiepskaje nadvorje, a taksama niasłušnyja i zapoźnienyja kamandy, jakija davali ekipažu rasijskija dyśpietčary.
Abstalavańnie aeradroma ŭ Smalensku pryznana nieefiektyŭnym, nieadekvatnym i jakoje nie zabiaśpiečvała umoŭ dla biaśpiečnaj pasadki pavietranaha sudna.
