Prezentacyja knihi «Šurpataja daroha» Viktara Sikory, apaviadaje Ada Rajčonak, jakaja asabista viedała paeta.
Śviatkavańnie pačałosia z prezientacyi knihi vieršaŭ «Šurpataja daroha» v.p. Viktara Sikory, syna słynnaha sadavoda Ivana Sikory z Małych Ałaškaŭ. Hetuju knihu vieršaŭ, mienavita da Dnia Voli, samatužna, u kolkaści 25 asobnikaŭ, ciaham nočy, vydrukavaŭ na pryntary i sšyŭ Źmicier Łupač.
Samatužnaje vydańnie «Šurpataj darohi».
Viktar Sikora ŭ 1942 hodzie pastupiŭ u Pastaŭskuju nastaŭnickuju sieminaryju, u jakoj vykładaŭ Barys Kit. Ź viasny 1944 hoda siabra Biełaruskaj Niezaležnickaj Partyi. Uletku 1944 hoda – na padpolnaj pracy. Viasnoj 1945 hoda arhanizavaŭ antysaviecki partyzanski atrad. Aryštavany 5 śniežnia 1945 hoda, viazień HUŁAHu. U Biełaruś viarnuŭsia naprykancy 1954 hoda. Žyŭ u vioscy Małyja Ałaški la Šarkoŭščyny. Pisaŭ patryjatyčnyja vieršy. Pamior 1 lipienia 2008 hoda.
Ciapier miascovyja šarkoŭščynskija hramadskija aktyvisty, najpierš Jazep Kvač, jaki daśledavaŭ rukapisny archiŭ V. Sikory, sa sšytkaŭ vieršaŭ Viktara Sikory zrabili knihu, vieršy padrychtavała da druku i apracavała padśvilskaja paetka Maryja Baravik.
Na prezientacyi knihi ŭ Hłybokim vystupili Jazep Kvač i Ada Eljeŭna Rajčonak, jakaja asabista viedała nie tolki Viktara Sikoru, ale i jaho baćku Ivana Sikoru, słynnaha biełaruskaha sadavoda. Było pračytana kolki vieršaj paeta. Usie prysutnyja atrymali pa knizie vieršaŭ Viktara Sikory.
V. Sikora
* * *
My ź miortvych paŭstaniem,
U šerahi staniem,
U bitvu my pojdziem
I dolu tam znojdziem.
Za lud naš biazdolny
Usie my supolna,
Za našu Radzimu.
Za chatu, sialibu.
Hej, lud biełaruski!
Spać chopić, pračnisia!
Miortvyja kličuć,
Zmahacca biarysia!
Hramadskija aktyvisty na Alei Słavy.
Potym ŭsie prysutnyja rušyli z kvietkami da Alei Słavy, dzie da pomnika adnaho z ajcoŭ BNR Vacłavu Łastoŭskamu byli ŭskładzienyja kvietki. Dalej, na Kopcieŭskim ćvintary, byli ŭskładzienyja kvietki na mahile Alberta Bacianoŭskaha, studenta Hłybockaj piedvučelni, siabra padpolnaj arhanizacyi Sajuza Biełaruskich Patryjotaŭ, viaźnia HUŁAHu. A na zakančeńnie hramada rušyła da doma pa vuł. Horkaha, 22, na jakim ustalavanaja šylda jašče adnamu ajcu BNR Kłaŭdyjušu Duž-Dušeŭskamu, aŭtaru bieł-čyrvona-biełaha ściahu. Kvietki da šyldy pakłaŭ ciapierašni haspadar doma spadar Sałodki.
Kvietki da pomnika Vacłavu Łastoŭskamu ŭskładaje Ada Rajčonak.
Jula Buka ŭskładaje kvietki na mahiłu Alberta Bacianoŭskaha.
Hłybačanie ŭskłali kvietki da miemaryjalnaj šyldy Kłaŭdyju Duž-Dušeŭskamu. Na zadnim płanie ŭ klatčataj kašuli – ciapierašni haspadar doma spadar Sałodki.
