Fota: ncdalliance.org
Vyprabavańni novaha preparatu kampanii Biogen Idec pad nazvaj adukanumab na 166 pacyjentach dajuć nadzieju chvorym na Alchiejmiera, raspaviadaje Forbes.
Preparat pa vynikach pieršych vyprabavańniaŭ značna skaraciŭ kolkaść ateraskleratyčnych blašak u sasudach hałaŭnoha mozhu pacyjentaŭ i zapavoliŭ paharšeńnie kahnityŭnych funkcyj.
Pacyjentam pryznačalisia vypadkovyja dozy lekaŭ, taksama davalisia «pustyški», kab adsiejać efiekt Płaceba (vypadak, kali pacyjent kaža ab palapšeńni stanu za košt adnoj tolki viery ŭ leki).
Tyja, chto prymali «pustyšku», za hod zaŭvažna pahoršyli svaje vyniki ŭ kahnityŭnych testach (na 2-3 bały pa 30-balnaj škale). Tyja ža, chto prymaŭ sapraŭdny preparat, za hod «razvučylisia» mienš. Pry hetym čym bolšaj była doza, tym lepšymi byli vyniki.
Lekary čakali źnižeńnie efiektu chvaroby Alchiejmiera na 20-30%, ale ŭ pieršych vyprabavańniach efiekty pasłabli na 70%.
U lekaŭ vyjaŭlenyja i pabočnyja efiekty, siarod jakich anamalii, što mohuć pryvieści da acioku mozhu. Jak śćviardžaje Biogen, aciok nie vyklikaje simptomaŭ i moža źmianšacca sa źmianšeńniem dozy, ale bolšaść lekaraŭ ličyć taki efiekt nieprymalnym.
Vyprabavańni adukanumabu buduć praciahvacca, bolš maštabnyja testy kampanija płanuje pravieści ŭžo ŭ hetym hodzie.
Adukanumab jość pieršym preparatam, jaki pakazaŭ efiekt adnačasova i va ŭpłyvie na sasudy hałaŭnoha mozhu, i ŭ zapavolvańni straty kahnityŭnych funkcyj.
***
Čaściej za ŭsio ad chvaroby Alchiejmiera cierpiać starejšyja za 65 hod. Na 2010 hod kolkaść chvorych na Alchiejmiera aceńvałasia ŭ 21-35 młn čałaviek pa ŭsim śviecie. Paśla pastanoŭki dyjahnazu chvory pražyvaje ŭ siaredniem 7 hod.
Siarod simptomaŭ na rańniaj stadyi rasstrojstva karotkačasovaj pamiaci, ź ciaham času chvory hublaje i doŭhačasovuju pamiać, aryjentacyju ŭ prastory, zdolnaść źviazana razmaŭlać, nie moža dahladać za saboj.
Pryčyny chvaroby na siońnia da kanca nie daśledavanyja, sučasnyja mietady lekavańnia mohuć adno źmiakčać simptomy.