«Hazieta Słonimskaja», «Intex-Press» i «Hancavicki čas» atrymlivajuć ad ministerstva infarmacyi papiaredžańni. Čynoŭniki karajuć «Hancavicki čas» i «Intex-Press» za skaračeńnie nazvy orhana, jaki rehistruje vydańnie: «Ministerstva infarmacyi RB» zamiest poŭnaj nazvy «….Respubliki Biełaruś».
U «Haziecie Słonimskaj» čynoŭniki nie zaŭvažyli paznaku pra pamier nakładu, jakaja, jak bačna z pdf-viersii, była na pieršaj staroncy vydańnia.
Dobra, pahladzim u šapiku Biełsajuzdruka, u jakich dziaržaŭnych hazietach takija ž skaračeńni. Hazieta «Respublika», apošni numar za 27 lutaha naohuł nie ukazvaje, ad kaho atrymała rehistracyju. Tut pišuć prosta: «rehistracyjnaje paśviedčańnie №4 ad 19 lutaha 2009 hoda».
Ciapier čytajem Zakon ab ŚMI: «U kožnym vypusku drukavanaha srodku masavaj infarmacyi pavinny być ukazany: «Respublikanski orhan dziaržaŭnaha kiravańnia ŭ śfiery masavaj infarmacyi, jaki zarehistravaŭ dadzieny drukavany srodak masavaj infarmacyi, numar paśviedčańnia ab dziaržaŭnaj rehistracyi».
Časopis dla dziaciej «Kačieli» ad Upraŭleńnia adukacyi Minharvykankama taksama skaračaje nazvu orhana, jaki vydaŭ rehistracyju.
Toje ž z časopisam «Vožyk» ad vydavieckaha doma «Źviazda». U 12 numary za minuły hod, redakcyja piša «RB» zamiest «Respublika Biełaruś».
Pa tym ža pryncypie nazvu orhana, dzie zarehistravany časopis, prapisvaje redakcyja… baranavickaj rajonki «Naš kraj». Pra papiaredžańnie aficyjnaj haziecie ŭ Baranavičach pakul nie viadoma. Nahadajem, za dva papiaredžańni na praciahu hoda ministerstva infarmacyi moža prypynić vypusk haziety.
fota intex-press.by
«Papiaredžańni vynosiacca ŭsim vydańniam, jakija parušajuć zakanadaŭstva ab SMI, — tłumačać Jeŭraradyjo ŭ Ministerstvie infarmacyi, — Jość ustalavanyja nazvy dziaržaŭnych orhanaŭ, Respublika Biełaruś nie skaračajecca».
Jeŭraradyjo: Ale hazieta «Respublika» zusim nie ŭkazvaje, jaki orhan vydaŭ paśviedčańnie ab rehistracyi.
Ministerstva infarmacyi: Dziakuj za infarmacyju.
