Rasijski telekanał «Rien-TV» prademanstravaŭ apošnimi dniami siužet pad nazvaj «Ukrainskija vajskoŭcy, jakija vyrvalisia z katła, maralna raskładajucca».
U im pakazana, jak ludzi ŭ vajskovaj i paŭvajskovaj formie ździekujucca ź mirnaha nasielnictva, bjuć mužčyn i žančyn, pahražajuć im zbrojaj.
Fejk ad «Rien-TV»
Rasijski kamientatar raspaviadaje, što heta robiać u Arciomaŭsku ŭkrainskija žaŭniery, jakija vyjšli z akružeńnia pad Debalcavam.
Adnak partał stopfake.org vykryŭ falšyŭku i apublikavaŭ aryhinał videa z kamier nazirańnia, na jakim bačnaja data zdymki — 26 kastryčnika 2014 hoda.
Sapraŭdnaje videa.
Aryhinalnaje videa było apublikavana na kanale Youtube 28 kastryčnika pad zahałoŭkam «Bajeviki «Apłota» źbivajuć mirnych žycharoŭ u Daniecku».
«Apłot» — uzbrojenaje prarasijskaje farmavańnie ŭ składzie vojsk tak zvanaj «DNR». Pieršapačatkova «Apłot» byŭ bajavoj arhanizacyjaj citušak u Charkavie, adnak potym aktyvisty źbiehli ŭ Danieckuju vobłaść i pad kiraŭnictvam byłoha majora ŭkrainskaj milicyi Alaksandra Zacharčanka vajavali suprać ukrainskaj armii.
Sa žniŭnia 2014 hoda Zacharčanka byŭ pryznačany kiraŭnikom «DNR».
