U rasparadžeńni redakcyi ZN.UA znachodzicca kopija prajekta pratakoła pa ŭrehulavańni situacyi na Danbasie, pieradadzienaha ŭ aŭtorak viečaram ŭdzielnikam trochbakovaj kantaktnaj hrupy ŭ Minsku pradstaŭnikami «DNR» i «ŁNR».
Dakumient, azahałoŭleny «Pratakoł pasiadžeńnia Trochbakovaj kantaktnaj hrupy z udziełam pradstaŭnikoŭ asobnych rajonaŭ Danieckaj i Łuhanskaj abłaściej adnosna kompleksu mier pa palityčnym urehulavańni kanfliktu», źmiaščaje 15 punktaŭ. Ich asnoŭny sens zvodzicca da nastupnaha.
— Zabiaśpiečyć usioabdymnaje spynieńnie ahniu z 10.00 12 lutaha 2015 hoda (pa Kijevie)
— Zabiaśpiečyć advod ciažkich uzbrajeńniaŭ (kalibram 100 mm i bolš): dla ŭkrainskich vojskaŭ — ad faktyčnaj linii sudakranańnia bakoŭ; dla ŭzbrojenych farmiravańniaŭ asobnych rajonaŭ Danieckaj i Łuhanskaj abłaściej — ad linii sudakranańnia bakoŭ pa Minskim miemarandumie ad 19 vieraśnia 2014 hoda. Taksama dakumientam vyznačajecca dalokaść adviadzieńnia sistem uzbrajeńnia roznaha typu dla stvareńnia zony biaśpieki. Advod pavinien pačacca nie paźniej druhoha dnia paśla spynieńnia ahniu, pracesu pavinny spryjać vajennyja ekśpierty ABSIE.
— Pryniać da 20 lutaha 2015 h. pastanovu Viarchoŭnaj Rady z ukazańniem pieraliku rajonaŭ, na jakija raspaŭsiudžvajecca asablivy status u adpaviednaści z Zakonam Ukrainy «Ab časovym paradku miascovaha samakiravańnia ŭ asobnych rajonach Danieckaj i Łuhanskaj abłaściej» (u miežach linii sudakranańnia, ustalavanaj dadatkam da Minskaha miemaranduma ad 19 vieraśnia 2014 h).
— Da 20 sakavika 2015 hoda ŭzhadnić z pradstaŭnikami asobnych rajonaŭ prajekt Zakona Ukrainy ab municypalnych vybarach u asobnych rajonach i prystupić da dyjałohu pa pytańniach pradastaŭleńnia hetym rajonam statusu aŭtanomii.
— Admianić da 23 lutaha 2015 hoda ŭsie rašeńni palityčnaha i vajennaha kiraŭnictva Ukrainy ab praviadzieńni Uzbrojenymi siłami i Nacyjanalnaj hvardyjaj antyterarystyčnaj apieracyi na Danbasie.
— Pryniać i ŭvieści ŭ dziejańnie da 25 lutaha 2015 hoda Zakon Ukrainy, jaki zabaraniaje pieraśled i pakarańnie asob u suviazi z padziejami, što mieli miesca ŭ asobnych rajonach Danieckaj i Łuhanskaj abłaściej. Zabiaśpiečyć pamiłavańnie, amnistyju i abmien usich asob, jakija ŭtrymlivajucca na terytoryi Ukrainy (usich na ŭsich). Hety praces pavinien zaviaršycca nie paźniej za piaty dzień paśla advodu.
— Adnavić sacyjalnuju śfieru asobnych rajonaŭ Danieckaj i Łuhanskaj abłaściej (vypłaty piensij i dapamoh) i zabiaśpiečyć biaśpieku dostupu, pastavak, zachoŭvańnia i raźmierkavańnia humanitarnaj dapamohi. Adnavić u poŭnym abjomie sacyjalna-ekanamičnaje ŭzajemadziejańnie bakoŭ, u tym liku ŭ bankaŭskaj śfiery.
— Tolki ŭ punkcie pad numaram 11 (z 15) prapanujecca — Advieści ŭsie zamiežnyja vajskovyja farmavańni, vajennuju techniku, a taksama vajenny piersanał i najmitaŭ z terytoryi Ukrainy, pry manitorynhu ABSIE. Razzbroić usie niezakonnyja hrupoŭki.
— Pravieści kanstytucyjnuju reformu va Ukrainie, jakaja ŭklučaje hłybokuju decentralizacyju praz zabieśpiačeńnie statusu aŭtanomii asobnych rajonach Danbasa.
— Arhanizavać svabodnyja i sumlennyja vybary ŭsich miascovych orhanaŭ ułady na padstavie ŭzhodnienaha z pradstaŭnikami asobnych rajonaŭ Danieckaj i Łuhanskaj abłaściej Zakona Ukrainy ab municypalnych vybarach u asobnych rajonach i Zakona Ukrainy ab asablivym statusie Danbasa pry mižnarodnym manitorynhu.
— I tolki ŭ pieradapošnim, 14-m punkcie, havorycca pra raspaŭsiud pracy misii ABSIE na ŭčastki miažy, što nie znachodziacca ŭ ciapierašni čas pad kantrolem Ukrainy, pryčym heta pavinna adbycca paśla ŭstupleńnia ŭ siłu papravak u Kanstytucyju Ukrainy, dy jašče i ŭ vyniku ŭzhadnieńnia z pradstaŭnikami asobnych rajonaŭ Danieckaj i Łuhanskaj abłaściej.
10 lutaha padčas pieramoŭ u Minsku pradstaŭnik «DNR» Dzianis Pušylin zajaviŭ, što pieradaŭ bakam dakumient dla aznajamleńnia.
