Dzianis Pušylin — emisar «DNR». Fota Siarhieja Zinina.
«Jany [pradstaŭniki DNR i ŁNR] navat nie byli hatovyja abmiarkoŭvać realizacyju pahadnieńnia ab spynieńni ahniu i vyvadu ciažkaha ŭzbrajeńnia», — havorycca ŭ paviedamleńni ABSIE, jakoje pryvodzić «Ukrainskaja praŭda».
«Trochbakovaja kantaktnaja hrupa padrychtavała padrabiazny płan dla kankretnaj realizacyi minskich Pratakoła i Miemaranduma, jakija zastajucca niezamiennaj asnovaj dla luboha mirnaha ŭrehulavańnia. Na žal, pradstaŭniki «DNR» i «ŁNR», jakija padpisali hetyja dakumienty, nie brali ŭdziełu ŭ pasiadžeńni hrupy, choć jany byli asabista zaprošanyja», - havorycca ŭ zajavie.
«Ich pradstaŭniki, jakija prysutničali na sustrečy, byli nie ŭ stanie abmierkavać vyłučanyja prapanovy. Zamiest hetaha jany zaklikali da pierahladu Pratakoła i Miemaranduma. Pasiadžeńnie było zakryta», — zajavili ŭ ABSIE.
Leanid Kučma raskazaŭ pra toje, što adbyłosia ŭ Minsku, kankretniej. Pušylin i Dajneha, pradstaŭniki samaabvieščanych «DNR» i «ŁNR», pahražali ŭkrainskamu boku.
«Jany patrabavali vydańnia ŭkaza prezidenta Ukrainy ab adnabakovym spynieńni ahniu, pahražajučy ŭ vypadku nievykanańnia hetaha ŭltymatumu adnaŭleńniem poŭnamaštabnych bajoŭ pa ŭsioj linii frontu», — skazaŭ Kučma.
Liniju sudakranańnia jany chacieli vyznačyć pa stanie na 31 studzienia. «U adkaz na pytańnie, jakija mohuć być harantyi taho, što ŭ budučyni jany nie vyznačać jakuju-niebudź inšuju liniju, jany pramaŭčali», — dadaŭ Kučma.
«DNR» i «ŁNR» finansujucca i ŭzbrojvajucca Rasijaj. Rasijskija pradstaŭniki nakiroŭvajuć i dziejańni ich maryjanietkavych administracyj.
