Najkruciejšy mikrabłohier hoda
Hałoŭnaj navukovaj padziejaj hodu redakcyja adnaho z samych aŭtarytetnych akademičnych časopisaŭ pryznała pieršuju ŭ historyi pasadku kaśmičnaha aparatu na kamietu — łabaratorny modul «Fiły» paśpiachova sieŭ na pavierchniu kamiety 67P/Čurumava—Hierasimienki 12 listapada. Ab hetym kaśmičny aparat paviedamiŭ u svaim tvitary.
Pretendentami na navukovuju padzieju hoda taksama byli:
Piarnaty Kulindadromieus zabajkalski, jak ni dziva, zusim nie radnia ptuškam
Naradžeńnie ptušak. Navukoŭcy prasačyli evalucyju dynazaŭraŭ i rańnich ptušak, daśledavali marfałahičnyja prykmiety 150 vidaŭ i taŭščyniu kostak noh 426 vidaŭ. Čałaviectva daviedałasia, jak radnia tyranazaŭra ź ciaham času pieratvaryłasia ŭ lebiedzia i sałaŭja. Vyśvietliłasia, što kostki ptušynych prodkaŭ ź ciaham času tančeli i mienieli, što dazvalała letunam dasiahać toj ježy, jakaja nie cikaviła ich vialikich bratoŭ.
Maładaja kroŭ. Baraćba z nastupstvami stareńnia prajšła paśpiachova na łabaratornych myšach. Kampanienty kryvi maładoj myšy amaładzili ciahlicy i mozh staroj myšy. Ekśpierymienty na ludziach užo pravodziacca: 18 chvorych na Alchiejmiera atrymlivajuć płazmu ad maładych zdarovych donaraŭ, vyniki buduć viadomyja ŭ nastupnym hodzie.
Armija nie nadta razumnych droidaŭ Handlovaj fiederacyi ź filmu «Zornyja Vojny»
Samastojnyja robaty. Ratujcie Saru Konar, robaty navučylisia kaapieravacca biez kantrolu čałavieka! Nievialičkija boty zmahli samastojna stvarać składanyja formy na stale. Kvadrakoptary navučylisia lotać čaradoj i nie sutykacca, prosta abmieńvajučysia źviestkami ab svajoj łakacyi. Padobna termitam inšyja robaty zmahli zbudavać prostuju strukturu, analizujučy patrebnyja dla pabudovy kroki.
Kampjutarny mozh. Inžyniery IBM raspracavali «niejramorfnyja» čypy, jakija apracoŭvajuć infarmacyju šlacham, padobnym da taho, jak pracuje čałaviečy mozh. 5,4 młrd tranzistaraŭ i 256 młn «kibiersinapsaŭ» čypa TrueNorth heta jašče nie 100 młrd kletak i 100 tryljonaŭ sinapsaŭ čałaviečaha mozhu, ale jany ŭžo sprabujuć spraŭlacca z apracoŭkaj masivaŭ źviestak nakštałt tych, što atrymlivaje čałaviečy zrok.
Na Sułaviesi tak rabili da taho, jak heta stała mejnstrymam
Piačornaje mastactva. Dahistaryčnaje hrafici na vostravie Sułaviesi maje ŭzrost prynamsi 40 tysiač hod. Adkryćcio hetych malunkaŭ moža źmianić sučasnyja ŭjaŭleńni ab raźvićci čałaviečaha rozumu, asabliva ab hieahrafii hetaha pracesu — raniej najdaŭniejšyja piačornyja malunki byli znojdzienyja ŭ Jeŭropie.
Lekavańnie dyjabietu. Daśledčyki znajšli šlach pieratvareńnia stvałavych kletak čałavieka ŭ štučnyja pankreatyčnyja beta-kletki. Takija samyja, jakija źniščajucca imunnaj sistemaj chvorych na dyjabiet 1 typu. I takija samyja, jakija vypracoŭvajuć insulin, jaki vymušanyja kałoć sabie dyjabietyki. Praŭda, hetyja kletki jašče nie navučylisia baranić ad imunnaj sistemy.
Jak falšyvaja pamiać pracuje na ludziach, hladzicie ŭ hulni Remember Me
Falšyvaja pamiać. Łabaratornym myšam bolš nie varta daviarać svajoj pamiaci, asabliva kali da ich mozhu padklučali optavałakno i praź jaho dasyłali impulsy łazieram. Takim šlacham navukoŭcy mohuć zrabić drenny ŭspamin dobrym i naadvarot. Naprykład, samca možna pierakanać, što ŭ hetym pakoi jon streŭ pieknuju samku, kali nasamreč tam jon napatkaŭ niepryjemny elektrašok.
Mikraspadarožniki. Prajektu CubeSat užo nie adzin hod (na samoj spravie 15), ale mienavita ŭ 2014-ym nievialičkija 10-santymietrovyja kubiki pa 8 tysiač dalaraŭ zrabili svoj kaśmičny bum. Za hod ich było zapuščana 75 — i kožny robić svaje vymiareńni i nazirańni, chto dla bujnych i małych instytutaŭ, chto dla vajskoŭcaŭ, chto dla karparacyj.
Čarlz Ksaŭrier uchvalaje. Patryk Ściuart u roli Prafiesara Iks u filmie «Ludzi Iks»
Hienietyčny ałfavit. Čatyry litary, A, T, G i C, dastatkova, kab rasšyfravać usio žyćcio na Ziamli. Ci amal usio. U hetym hodzie hienietyčny ałfavit zajmieŭ dźvie novyja litary, X i Y. Da čatyroch vidaŭ zvykłych azotystych asnavańniaŭ, čyja paśladoŭnaść u malekule DNK i źjaŭlajecca kodam, što pieradaje infarmacyju praz pakaleńni, dadali dva štučnych i zusim nie padobnych da naturalnych. Imi paśpiachova ŭzbahacili hienom kiškovaj pałački — takim čynam u pierśpiektyvie možna «navučyć staroha sabaku novym fokusam».
Apošniaje adkryćcio pieramahło ŭ hałasavańni čytačoŭ. Nastupnym pa simpatyjach karystalnikaŭ stała «maładaja kroŭ», a pasadka na kamietu zaniała tolki treciaje miesca.
