Mitrapalit Minski i Zasłaŭski Pavieł, Patryjaršy Ekzarch usioj Biełarusi Pavieł nie admaŭlajecca ad płanaŭ vyvučyć biełaruskuju movu.
Pra heta kiraŭnik BPC paviedamiŭ siońnia žurnalistam.
«Kali ja siudy pryjechaŭ, to adrazu zahruziŭsia knihami i padručnikami. Dumaŭ: usio, ciapier budu vučyć. I ŭ mianie nie prapała heta žadańnie,
ale jość vialikaja spakusa. Usie havorać pa-rusku. I dumaješ: paźniej, potym…», — skazaŭ mitrapalit.
Jon uspomniŭ ab svaim słužeńni ŭ inšych krainach, dzie jamu treba było hutaryć na anhlijskaj. Pavodle archireja, jon prosta vymušany byŭ heta zrabić, kali trapiŭ u całkam anhłamoŭnaje asiarodździe. «Voś tut ja vymušany byŭ i havaryć pa-anhlijsku, i słužyć, i prapaviedavać», — adznačyŭ kiraŭnik BPC.
Mitrapalit dadaŭ, što ŭžo vielmi dobra razumieje biełaruskuju, ale pakul što jamu ciažka razmaŭlać samomu.
«Abaviazkova budu zajmacca biełaruskaj movaj, bo ja baču, jak ludzi reahujuć, kali ź imi razmaŭlaješ na rodnaj movie», — adznačyŭ ekzarch.
Akramia taho, jon adznačyŭ, što mova moža jak abjadnoŭvać ludziej, tak i raźjadnoŭvać. «Vielmi jarki dla nas prykład — našy susiedzi va Ukrainie. Mova źjaviŭsia čyńnikam padziełu», skazaŭ jon.
Mitrapalit źviarnuŭ uvahu, što, naprykład, u ZŠA ŭžyvajucca dźvie movy: ispanskaja i anhlijskaja. Nichto nie prapanuje z zaŭtrašniaha dnia pačynać havaryć na niejkaj adnoj. Jašče adzin prykład — Šviejcaryja, dzie vykarystoŭvajecca čatyry movy.
«Sproby padziełu ludziej (na moŭnaj hlebie) treba spyniać na samym pačatkovym uzroŭni. Dziakuj Bohu, što ŭ nas u Biełarusi takoha niama.
Choć ja časam baču sproby z boku niekatorych ludziej. Ale i kiraŭnik dziaržavy, i ŭrad trymajuć situacyju pad kantrolem», — padkreśliŭ archirej.
