Ministerstva abarony Biełarusi abviarhaje infarmacyju, što źjaviłasia 24 listapada ŭ sacyjalnych sietkach, a zatym i na internet-resursach, pra nibyta pakinutaha na choładzie na niekalki hadzin u jakaści pakarańnia vajennasłužačaha.
Paviedamlałasia, što incydent adbyŭsia na terytoryi Minska, v/č 35730. Niejki vidavočca vykłaŭ u sietku vielmi karotki rolik, źniaty z akna. Na im bačny adzinoki sałdat na placy. Rolik maje kamientar, napisany z pamyłkami i źniavahami ŭ adras biełaruskaj armii. Ź jaho vynikaje, što vajennasłužačy znachodzicca na marozie treciuju hadzinu. Aŭtar zrabiŭ vysnovu, što sałdat pakarany za niejkuju pravinnaść.
«Hetaja infarmacyja i vysnovy nie adpaviadajuć rečaisnaści i nosiać vielmi tendencyjny charaktar. Heta chłuśnia i pravakacyja. Infarmacyja absalutna nie adpaviadaje rečaisnaści», — zajavili BiełaPAN u pres-słužbie Ministerstva abarony. Tam paviedamili, što vajennasłužačy padčas pierapynku ŭ vučebnych zaniatkach niekatory čas achoŭvaŭ vajennuju majomaść, jakaja vykarystoŭvałasia pry ich praviadzieńni. U pryvatnaści, skryni z vučebnymi hranatami.
