U 1947 hodzie były premjer-ministr Vialikabrytanii Uinstan Čerčyl źviarnuŭsia da ZŠA z zaklikam pravieści atamnuju bambardziroŭku Maskvy, kab abaranić Jeŭropu ad savieckaj ekspansii, śviedčać rassakrečanyja dakumanty amierykanskaha FBR.
Svaju prapanovu prezidentu ZŠA Hary Trumenu Čerčyl pieradaŭ praź sienatara-respublikanca Stajłza Brydžesa, jaki znachodziŭsia ź vizitam u Brytanii, piša dailymail.co.uk.
Čerčyl ličyŭ, što tolki źniščyŭšy kamunistyčnuju viarchušku na čale sa Stalinym, možna abaranić Zachad. Adzinaje ŭratavańnie dla cyvilizacyi — abviaścić SSSR pahrozaj dla miru i atakavać jaho,
pisaŭ palityk, jaki z 1940 pa 1941 hady adziny supraćstajaŭ Hitleru.
U toj čas u SSSR nie było mahčymaści abaranicca ad atamnaj ataki ci adkazać svaim jadziernym udaram — savieckaja bomba była vyprabavanaja tolki ŭ 1949 hodzie.
U 1948 hodzie SSSR zabłakavaŭ lubuju naziemnuju suviaź Zachodniaha Bierlina sa źniešnim śvietam. Amal ceły hod usie pradukty bierlincam pastaŭlali tolki samaloty avijacyi ZŠA, Vialikabrytanii i inšych zachodnich krainaŭ.
U 1945 hodzie Čerčyl, jaki zaŭsiody byŭ antykamunistam, prajhraŭ vybary i syšoŭ z pasady premjera, adnak znoŭ staŭ na čale ŭrada Brytanii ŭ 1951-m.
Mienavita jamu naležyć vyraz «žaleznaja zasłona» (1946). Hety vyraz dahetul vykarystoŭvajecca pry apisańni situacyi ŭ padkantrolnych kamunistam krainach padčas chałodnaj vajny.
