Kramloŭskaja prapahanda stvaryła vielizarny lik ŭjaŭnych ekśpiertaŭ, jakija raspaviadajuć rasiejcam praz rasiejskija ŚMI, što Hiermanija nibyta ŭstała na bok Rasii va ŭkrainskim pytańni, choć na samaj spravie heta nie tak, piša niamiecki časopis Der Spiegel. Aproč ich, rasiejcaŭ durać fanatyki teoryj zmovy i antysiemity.
Łorenc Chaah
«Tak, naprykład, ci viedajecie vy niamieckaha prafiesara i kiraŭnika adnaho viadomaha instytuta pa imi Łorenc Chaah, jaki nastolki razumny, što kamientuje pytańni palityki, ekanomiki, kasmanaŭtyki i anieksiju Kryma? — zadajuć pytańnie svaim niamieckim čytačam aŭtary materyjału. — Nie? Tady vy, pa ŭsioj bačnaści, prosta nie čytajecie rasijskich haziet, tamu što na ich staronkach tak zvanaha niamieckaha prafiesara Chaaha niaredka drukujuć u zahałoŭkach». Asabliva časta jaho vykazvańni cytuje rasijskaje dziaržaŭnaje infarmahienctva «TASS», pakolki Chaah kaža toje, što chočuć pačuć u Rasii. U adnym z vykazvańniaŭ Chaaha, naprykład, havorycca pra toje, što «ŭ Hiermanii z razumieńniem staviacca da pazicyi Rasii i Kryma».
Miž tym u Hiermanii, jak padkreślivaje vydańnie, hety «ekśpiert — fantom: za apošnija 25 hadoŭ ni ŭ vodnaj niamieckaj haziecie niama zhadki pra jaho. Taksama nieviadoma, u jakim instytucie pracuje hety niemiec».
Krystof Chiorstel
Pry hetym Chaah — nie adziny ŭ svaim rodzie, praciahvaje Der Spiegel. «Ekśpierty-samazvancy karystajucca vialikaj papularnaściu ŭ rasijskich ŚMI. Jašče adzin prykład — Krystof Chiorstel. Na samaj spravie hety niemiec — prychilnik pravaradykalnych idej, jaki adnojčy abvinavaciŭ kanclera Hiermanii Mierkiel u dziaržaŭnaj zdradzie. Adnak infarmahienctva RIA «Naviny», jakoje ŭvachodzić u miedyja-chołdynh Kramla, nazyvaje jaho «daradcam Fiederalnaha ŭrada Hiermanii».
A Russia Today, jakaja viaščaje za miažoj, časta drukuje kamientary «byłoha supracoŭnika viadučych niamieckich telekanałaŭ» Kiena Jebsena, jakaja vykryvaje antyrasiejskija tendencyi na niamieckim telebačańni. Niamieckija kanały ARD i ZDF nastrojvajuć niemcaŭ, pa słovach Jebsena, suprać Rasii. «I sapraŭdy, Jebsen pracavaŭ viadučym, ale na radyjo RBB, — adznačaje vydańnie. — Ale jaho zvolnili za antysiemickija vykazvańni, a Russia Today ničoha pra heta nie raspaviadaje «.
Kien Jebsen
Nastupnaha «niamieckaha palitołaha» kličuć Kiort Majer. Rasijski prapahandyscki partał «Ukraina.ru» pryvodzić jaho słovy pra toje, što «ŭ Hiermanii zabaroniena padtrymlivać Pucina». Tym nie mienš, u niamieckich archivach palitołaha z takim imiem prosta nie znajšłosia, a sam partał pakinuŭ biez adkazu prośbu Der Spiegel dać jamu kantakty hetaha Majera.
Darečy, pad aŭtarstvam Majera ŭ rasijskaj haziecie «Maskoŭski kamsamolec» vyjšaŭ jašče adzin vielmi papularny artykuł, u jakim raspaviadajecca pra toje, što ŭrad FRH nibyta moža dakazać, što źbity nad Ukrainaj «Boinh» byŭ źniščany nie sistemaj «Buk», a ŭkrainskaj batarejaj C-125 «Niava», što nibyta paćviardžajuć dadzienyja niamieckich radyjołakacyjnych sistem. Choć u rečaisnaści, jak dadaje Der Spiegel, u adkazie niamieckaha ŭrada na zapyt «levych» havaryłasia, što «jakich-niebudź dakładnych źviestak ab ŭžyvańni rakiet u ich nie było: u dzień katastrofy samaloty AVAKS zarehistravali niavyjaŭleny sihnał z radara. Akramia jaho, pastupali sihnały z batarei S-125, ale ŭ hetym rajonie sihnał z hetaj batarei pastupaje zaŭsiody».
