Pytańnie palitźniavolenych pa-raniejšamu zastajecca pieraškodaj na šlachu supracoŭnictva pamiž Biełaruśsiu i ZŠA. Ab hetym zajaviŭ namieśnik pamočnika dziaržsakratara ZŠA pa pytańniach demakratyi, pravoŭ čałavieka i pracy Tomas Mielia 10 vieraśnia žurnalistam u Minsku.
Pavodle jaho słoŭ, pytańnie ab palitźniavolenych uzdymałasia ŭ chodzie sustrečy mižviedamasnaj uradavaj delehacyi ZŠA ŭ MZS Biełarusi, jakaja adbyłasia 9 vieraśnia.
Mielia padkreśliŭ, što pazicyja Złučanych Štataŭ zastajecca niaźmiennaj. «ZŠA zaŭsiody zaklikali da vyzvaleńnia ŭsich palitźniavolenych u Biełarusi, — skazaŭ Mielia. — U nas taksama adbyłasia sustreča sa svajakami palitźniavolenych, na jakoj ja zapeŭniŭ ich, što hetaje pytańnie zastaniecca dla nas važnym».
Adkazvajučy na pytańnie BiełaPAN, što pa hetym pytańni skazali pradstaŭniki biełaruskaha MZS, Mielia adznačyŭ: «Ich pazicyja na praciahu niekalkich hadoŭ nie mianiajecca. Jany praciahvajuć nazyvać ich «tak zvanymi palitźniavolenymi». I ŭčarašniaja zajava MZS (pa vynikach sustrečy) adlustroŭvaje tyja razychodžańni, jakija jość u nas pa hetym pytańni».
Nahadajem, u paviedamleńni MZS pa vynikach sustrečy nie zhadvałasia ab tym, što jaje ŭdzielniki abmiarkoŭvali pytańnie ab palitźniavolenych u Biełarusi.
U MZS ź mižviedamasnaj delehacyjaj ZŠA, jakaja znachodzicca ŭ Minsku z 8 pa 11 vieraśnia, sustreŭsia namieśnik ministra zamiežnych spraŭ Alaksandr Hurjanaŭ.
U sustrečy ŭdzielničali pamočnik administratara Ahienctva ZŠA pa mižnarodnym raźvićci Pejdž Alaksander, namieśnik pamočnika ministra abarony ZŠA Evielin Farkas, namieśnik pamočnika dziaržaŭnaha sakratara ZŠA Tomas Mielia, časovy pavierany ŭ spravach ZŠA ŭ Biełarusi Skot Rołand, supracoŭniki Dziarždepartamienta, rehijanalnaha adździaleńnia Ahienctva ZŠA pa mižnarodnym raźvićci i pasolstva ZŠA ŭ Minsku.
9 vieraśnia z amierykanskaj delehacyjaj taksama sustrelisia pradstaŭniki biełaruskaj apazicyi. Sustreča doŭžyłasia bolš za dźvie hadziny. Pa jaje vynikach lidar Abjadnanaj hramadzianskaj partyi Anatol Labiedźka zajaviŭ BiełaPAN, što mižviedamasnaja delehacyja ZŠA manitoryć situacyju ŭ Biełarusi, ale «damovicca uładam z amierykancami budzie ciažej, čym ź jeŭrapiejcami».
Prahramaj vizitu mižviedamasnaj delehacyi ZŠA zapłanavany taksama sustrečy ŭ biełaruskich ministerstvach abarony, ekanomiki i adukacyi.
