Ryzyka zaražeńnia adpačyvalnikaŭ cerkaryjozam na voziery Narač sioleta zachoŭvajecca, paviedamiła na pres-kanfierencyi 10 lipienia ŭ Minsku zahadčyca adździaleńnia kamunalnaj hihijeny Respublikanskaha centra hihijeny, epidemijałohii i hramadskaha zdaroŭja Iryna Žaŭniak.
«Cerkaryi z Naračy nie źnikli. Heta pryrodnaja źjava, abumoŭlenaja samim vozieram, — u jaho pakataje dno, i heta sadziejničaje razmnažeńniu dvuchstvorkavych maluskaŭ. Jany źjaŭlajucca pramiežkavym haspadarom cerkaryj — ličynak hielmintaŭ vadapłaŭnych ptušak», — adznačyła śpiecyjalist.
Pavodle jaje słoŭ, raźvićcio cerkaryj u Naračy pravakujuć sami ludzi, padkormlivajučy kala bieraha husiej i kačak. «Jajki hielmintaŭ traplajuć u vadu, potym u dvuchstvorkavy malusk, pieratvarajucca ŭ ličynku, nu a potym ličynki prachodziać peŭny cykł, vychodziać z maluska i ruchajucca na ciapło. Ich kančatkovyja haspadary — tyja ž vadapłaŭnyja ptuški. Jany ŭkaraniajucca da ich pad skuru, adtul u kroŭ, kišečnik, i cykł zamknuŭsia — jany pieratvarajucca tam u asobinu, jakaja dasiahnuła pałavoj śpiełaści», — skazała śpiecyjalist.
Jana padkreśliła, što ŭ arhaniźmie čałavieka ličynki nie mohuć pieratvarycca ŭ asobinu, jakaja dasiahnuła pałavoj śpiełaści, i hinuć pry ukaranieńni pad skuru. «A heta čužarodny białok, jaki ŭ mnohich vyklikaje alerhičnuju reakcyju, što prajaŭlajecca ŭ pačyrvanieńni, śvierbie», — skazała Žaŭniak.
Pavodle słoŭ śpiecyjalista, na ŭsich plažach Naračy «ŭžo daŭno stajać płakaty» ź pieralikam mier prafiłaktyki cerkaryjozu i abstalavanyja dušavyja kabinki. «Hałoŭnaja rekamiendacyja — adrazu ŭsie zmyć. Kali źjavilisia kliničnyja prajaŭleńni, to ja raju źviarnucca da ŭrača, asabliva dzieciam, bo ŭ ich alerhičnaja reakcyja moža vyklikać pavyšeńnie tempieratury», — padkreśliła Žaŭniak.
