Kiraŭnik łukašenkaŭskaha sacyjałahičnaha centra ECOOM Siarhiej Musijenka adkazaŭ na pytańni «Našaj Nivy» adnosna ŭkrainskaha kryzisu.
«Naša Niva»: Siarhiej Ryhoravič, vy ŭradženiec Ukrainy. Mocna pieražyvajecie?
Siarhiej Musijenka: Kaniečnie, heta moj vialiki bol.
«NN»: Bačycie šlachi vychadu z palityčnaha i vajskovaha kryzisu?
SM: Ja pierakanany, što tyja, chto zavaryŭ hetuju kašu, i pavinny jaje vyrašyć. Kali śviet na miažy Treciaj suśvietnaj vajny, nie čas mieracca, u kaho z parubkaŭ daŭžejšy… Va ŭsich vielmi mnoha ambicyj, a ich treba trošku zacuhlać dziela miru i spakoju va Ukrainie.
«NN»: Vy vierycie ŭ imaviernaść Treciaj suśvietnaj?
SM: Kali z usich bakoŭ pra heta kažuć, to inšym razam i zadumaješsia. Heta nie našy hulni, u jakich nie chočacca brać udzieł.
«NN»: Čamu biełaruskija elity paličyli ŭ hetaj situacyi za lepšaje admaŭčacca?
SM: Zanadta vysokija staŭki. Adbyvajecca novy pieradzieł śvietu. Kali zamoŭca ŭsioj hetaj situacyi hulaje miečanymi kartami, to lepš ustrymacca. Biełaruś nie ŭnikalnaja ŭ hetym płanie kraina. Toj ža Kitaj, jaki maje ahramadnyja intaresy va Ukrainie, ličyć za lepšaje zachoŭvać niejtralitet.
«NN»: Nursułtan Nazarbajeŭ vykazaŭsia za terytaryjalnuju cełasnaść Ukrainy.
SM: Jość jašče ludzi, što ćviaroza myślać. Situacyja vielmi zapuščanaja, znajści adzinuju praŭdu ŭžo naŭrad ci ŭdasca. Słavianie iduć na vajnu sa słavianami. Hetaha i dabivajucca zamoŭcy. Standartnyja miechanizmy ŭrehulavańnia situacyi tut užo nie dziejničajuć.
«NN»: Čamu?
SM: Bo razburanaje mižnarodnaje prava. Tak było ŭ Siryi. Z Božaj dapamohaj Papy vajnu tam udałosia spynić. Ciapier uvaha «Jeŭrańjusa» pierakačavała ź Siryi na Ukrainu. Vajna padyšła zanadta blizka da našych miežaŭ — heta biada. Ciapier nie čas raźbiracca, chto vinavaty, a chto nie. Čas sadzicca za stoł pieramovaŭ. Nie mohuć brackija krainy vajavać. Čyje ž intaresy jany tak začapili? Ja nie ŭjaŭlaju, kab u vypadku sutyčak u Ałabamie ci Mičyhanie z rasijskaha boku była takaja vializnaja ŭvaha.
«NN»: Vy abvinavačvajecie ZŠA?
SM: Pahladzicie, a chto pryjazdžaŭ na Majdan? Chto kazaŭ, čamu tam niama nivodnaha amierykanskaha ściaha, a na nastupny dzień jany źjavilisia? Čamu ŭ ZŠA tak razdražniona ŭsprymajuć sproby Hiermanii narmalizavać adnosiny?
«NN»: A jak Vam pazicyja Jeŭrasajuza?
SM: Jana niaŭciamnaja. Ja čarhovy raz pierakonvajusia, što heta časovy sajuz, jaki nie maje ahulnaha jasnaha bačańnia. Na čym hruntujecca paśpiachovaść miždziaržaŭnych sajuzaŭ? Na mahčymaści chutkaha reahavańnia. Kaniečnie, ja razhladaju vielmi pazityŭna inicyjatyvy Anhieły Mierkiel, jakaja sprabuje zadziejničać Kemierana ŭ vyrašeńni kanfliktu. Adnymi kredytami, jak sprabuje zrabić toje ES, spravu nie vyrašyć.
«NN»: Ci jość imaviernaść taho, što rasijskija vajskoŭcy buduć na vulicach Minska ci Homiela?
SM: U hetym žyćci ničoha vyklučać nielha. Ale ja dumaju, što my hetaha nie dapuścim. I siońniašniaja ŭzvažanaja pazicyja kiraŭnictva — tamu śviedčańnie. Niama nijakaj roźnicy, ci heta rasijski, ci nataŭski sałdat budzie na našaj ziamli.
