U kitajska-biełaruskim industryjalnym parku pabudujuć niekalki škoł, dziciačych sadkoŭ i kazino. Pra heta 24 lipienia na hramadskich abmierkavańniach u Smalavičach (Minskaja vobłaść) paviedamiła hałoŭny architektar prajekta BiełNDI horadabudaŭnictva Žanna Sinicyna.
Pavodle jaje słoŭ, infrastruktura parka ŭklučyć u siabie šmatkvaternaje i siadzibnaje žyllo, pramysłovyja, transpartnyja abjekty. Buduć pabudavanyja try škoły, piać dziciačych sadkoŭ. Taksama praduhledžana budaŭnictva kazino.
Jak paviedamiŭ pieršy namieśnik hienieralnaha dyrektara kitajska-biełaruskaj kampanii pa raźvićci industryjalnaha parka Kirył Karaciejeŭ,
detalovy płan raspracavany na terytoryju parka ŭ pamiery 1.120 ha, kala 10% ad jakoj składzie pramysłovaja zona.Pry hetym jon padkreśliŭ, što 498 ha buduć adviedzieny pad zialonyja nasadžeńni.
Zhadanaja terytoryja pavinna być asvojena da 2020 hoda. Tolki na stvareńnie ahulnaj infrastruktury płanujecca nakiravać 0,5 młrd. dołaraŭ.
Pavodle słoŭ Karaciejeva, asnoŭnaje budaŭnictva pačniecca z uźviadzieńnia ŁEP, budaŭnictva hazapravoda, sistem vodazabieśpiačeńnia i vodaadviadzieńnia.
Jon zaznačyŭ, što ŭ detalovym płanie byli ŭličany prapanovy, jakija pastupili padčas hramadskich abmierkavańniaŭ. Karaciejeŭ zapeŭniŭ udzielnikaŭ schodu ŭ tym, što ekałahičnyja patrabavańni da zabudovy buduć vykanany, na terytoryi industryjalnaha parka nie buduć budavacca pradpryjemstvy z sanitarnaj zonaj bolš za 300 m. Pavodle słoŭ čynoŭnika, heta aznačaje, što "brudnych vytvorčaściaŭ u technaparku nie budzie, a buduć tolki vysokatechnałahičnyja vytvorčaści".
"Dziaržava razumieje, što pad industryjalny park iduć kaštoŭnyja ziemli", — padkreśliŭ jon.
Nahadajem, ukaz ab kitajska-biełaruskim industryjalnym parku, jaki raźmieścicca na terytoryi bolš jak 8 tys. ha ŭ Smalavickim rajonie Minskaj vobłaści, byŭ padpisany ŭ červieni 2012 hoda. Mierkavany abjom pramych inviestycyj u hety prajekt składzie kala 2 młrd. dołaraŭ, a pavodle prahnozaŭ pasolstva KNR, moža być pavialičany da 5,5 młrd. dołaraŭ.
