Ad takoj mašyny jelskija ŭłady admovilisia paśla rezanansu ŭ presie.
Jelski rajonny adździeł adukacyi płanuje nabyć HAZ 3302 Biełava 1220 za 250 młn rubloŭ (kala 21.760 jeŭra) .
Biudžetny «UAZ Patryjot» kaštuje na 10 tysiač jeŭra mienš, čym płanuje patracić na inšaje aŭto Jelski rajvykankam.
Admoviŭšysia ŭ minułym hodzie paśla masavaj krytyki ad kupli džypa za 587 młn rubloŭ, hetym letam, u Hod bieražlivaści, jelskija ŭłady płanujuć nabyć za 542 młn dva aŭtamabila, piša «Salidarnaść».
U minułym hodzie dla staršyni Jelskaha rajvykankama za srodki ź miascovaha biudžetu chacieli kupić šykoŭny pradstaŭničy džyp Volkswagen Touareg za 587 młn rubloŭ. Ale paśla rezanansu čynoŭniki vymušanyja byli admovicca ad zadumki.
Adznačym, što padobnyja pakupki šykoŭnych aŭtamabilaŭ čas ad času ździajśnialisia čynoŭnikami ŭ inšych rehijonach. Jak vynik, u sakaviku hetaha hoda kiraŭnik dziaržavy zabaraniŭ nabyvać słužbovyja mašyny daražej za 25 tysiač jeŭra.
Ale niadaŭna na sajcie dziaržzakupak pradstaŭniki Jelskaha rajvykankama raźmiaścili novyja abjavy ab kupli aŭto.
Pa-pieršaje, adździeł adukacyi za 250 młn rubloŭ (kala 21.760 jeŭra) płanuje nabyć HAZ 3302 Biełava 1220.
Pa-druhoje, čynoŭniki chočuć kupić usiedarožnik koleru čorny abo sierabrysty mietalik za 292 młn rubloŭ. Nie vyklučana, što ŭ novy aŭtamabil pierasiadzie toj ža kiraŭnik rajona, jaki jeździć na «Nisanie», jaki «razvalvajecca».
U Jelskim rajvykankamie na pytańnie «Salidarnaści», ci budzie pryznačany novy ŭsiedarožnik dla staršyni, adkazać nie zmahli.
— Nie mahu vam ničoha skazać. Jašče nichto ničoha nie vyrašyŭ. Da pabačeńnia, — skazali tam.
Zhodna kursu, ustalavanaha ŭ sieradu na valutna-fondavaj biržy, suma ŭ abjavie adpaviadaje 25 410 jeŭra. Heta značyć, krychu bolš, čym dapuskaje prezidencki ŭkaz.
Darečy, pry žadańni rajvykankam moh by kupić usiedarožnik za značna mienšy košt. Da prykładu, za biudžetny «UAZ Patryjot» prosiać 168 młn rubloŭ (kala 15 tysiač jeŭra).
