U podbiŭcy rašeńnia — infarmacyja pra seksualnyja orhii ź niepaŭnaletnimi chłopčykami i dziaŭčynkami, jakija šmat hadoŭ ładziŭ jepiskap z udziełam inšych śviataroŭ.
Bojan Javanavič, były student bahasłoŭja, jaki navučaŭsia ŭ eparchii jepiskapa Vasila Kačavendy, kaža, što viedaŭ pra orhii. Biskup źviartaŭsia asabista da Javanaviča z prośbaj pryvieści da jaho jamu maleńkich dziaciej da 10 hadoŭ, jakich Javanavič navučaŭ Zakonu Boskamu. Jon raspavioŭ, što nastajacieli manastyroŭ arhanizoŭvali spatkańni jepiskapa i jaho haściej z maładymi pasłušnikami.
Javanavič raspaviadaje: «Adnojčy ranicaj adzin ź ich patelefanavaŭ mnie i paprasiŭ mianie, kab ja adkryŭ numar jepiskapa, kab jon moh zabrać svaje rečy. Ja skazaŭ: «Što robiać vašy rečy ŭ numary jepiskapa?» Jon adkazaŭ: «Nie rabicie vyhlad, što vy durań».
Biskup Kačavenda vioŭ raskošny ład žyćcia i byŭ źviazany z abvinavačanymi mižnarodnym trybunałam liderami baśnijskich serbaŭ Radavanam Karadžyčam i Ratkam Mładzičam.
Niekalki čałaviek raniej vystupali z abvinavačvańniami na adras jepiskapa, ŭ tym liku i baśnijskaja dziaŭčynka-musulmanka, jakaja zajaŭlała, što Kačavenda prymusiŭ jaje pryniać chryścijanstva, a potym zhvałciŭ, kali joj było 16.
Skandałam u 2010 hodzie stała abnarodavańnie fotazdymku biskupa ź viadomym białhradzkim stryptyzeram, jaki pryznaŭsia, što mieŭ intymnyja adnosiny ź biskupam.
Ale apošniaj kropkaj stali paviedamleńni serbskaj hazety «Blic» pra videaroliki, na jakich Kačavenda zajmaŭsia aralnym seksam i inšymi dziejańniami seksualnaha charaktaru z maładymi ludźmi. Paźniej hetyja videa byli vyviešanyja ŭ Siecivie.
Były jepiskap, ź jakoha ciapier źniaty san, moža sutyknucca sa šmatlikimi abvinavačvańniami ŭ sudzie. Advakat Duška Tomič, kaža, što jon sabraŭ śviedčańni mnohich ludziej pra toje, što jany byli achviarami seksualnaha hvałtu z boku Kačavendy.
«Kali ja pračytaŭ usiu infarmacyju i pakazańni roznych ludziej, jakim jon narabiŭ šmat škody, ja byŭ u šoku, jak pravasłaŭny viernik i jak čałaviek, ad taho, što takaja asoba pa-raniejšamu prysutničaje ŭ hramadzkim žyćci, — kaža Duška Tomič. — Jon maje ranh hienerała serbskaj armii, jon blizki siabar prezydenta Respubliki Serbskaj Miłarada Dodzika i mnohich upłyvovych biznesoŭcaŭ».
Kačavenda admaŭlaje svaju vinu i pryhraziŭ padać u sud tych, chto «raspaŭsiudžvaje paklop na jaho». Carkva, pryniaŭšy jaho adstaŭku, paźbiahała lubych zhadak pra skandał, zajaviŭšy, što jepiskap syšoŭ u adstaŭku pa stanie zdaroŭja.
Heta druhi publičny skandał padobnaha kštałtu, niekalki hadoŭ jepiskap Pachom byŭ abvinavačany ŭ seksualnych ździekach nad čatyrma niepaŭnaletnimi.
Serbskaja pravasłaŭnaja carkva zachoŭvaje maŭčańnie ŭ adkaz na ŭsie skarhi pra seksualnyja damahańni.
Biskup Ryhor, adzin ź piaci čalcoŭ Śviatoha Synodu, zaklikaŭ nie śpiašacca z vysnovami, patłumačyŭšy, što carkoŭnaje raśśledavańnie spravy «nie moža adbyvacca chutka».
«Kali my daviedajemsia, što było na samoj spravie, to, zhodna z našaj vieraj, my nie pavinny nienavidzieć čałavieka, a pavinny lubić jaho i malicca za jaho. Ale sud budzie rabić svaju pracu» — skazaŭ jepiskap Ryhor.
