«Iźviestija»: Łukašenkaŭcy hatovyja pradać MZKC, ale pierabirajuć, kamu 6

Pryncypovaja zhoda ab prodažy rasijskamu boku kantrolnaha pakieta akcyj AAT «Minski zavod kołavych ciahačoŭ» (MZKC) była dasiahnutaja ŭ sakaviku na sustrečy vice-premjera ŭrada Rasii Arkadzia Dvarkoviča i pieršaha namieśnika prem'jer-ministra Respubliki Biełaruś Uładzimira Siamaški.

— Takoje pahadnieńnie dasiahnutaje, i ab im užo prainfarmavany rasijski kiraŭnik urada Dźmitryj Miadźviedzieŭ i kiraŭnik Biełarusi Alaksandr Łukašenka, — raskazała krynica va ŭradzie. Pavodle jaje słovaŭ, adzinym sprečnym momantam pakul zastajecca kandydatura pakupnika. Biełaruś nie choča pradavać minskaje pradpryjemstva KamAZu abo «Urałvahonzavodu», vytvorcam anałahičnaj pradukcyi. Ale mienavita taki varyjant prapanuje rasijski bok.

Jak zajaviła krynica, blizkaja da pieramovaŭ, u jakaści pakupnikoŭ biełarusy chacieli b bačyć «Kancern SPA «Ałmaz-Antej», «NVA «Spłaŭ», «NVK «Kanstruktarskaje biuro mašynabudavańnia» i AAT «Karparacyja «Maskoŭski instytut ciepłatechniki». Taki varyjant respublikanskija ŭłady matyvujuć tym, što MZKC daŭno supracoŭničaje z nazvanymi arhanizacyjami, pastaŭlajučy im svaju pradukcyju, i miarkujecca, što novy ŭłaśnik budzie ŭdzielničać u raźvićci i madernizacyi minskaha zavoda. Adpaviedna, u biełaruskaha boku jość aściarohi, što KAMAZ i «Urałvahonzavod» jak kankurenty nie stanuć nadavać pažadanaj uvahi raźvićciu pradpryjemstva.

Pradukcyja MZKC šyroka vykarystoŭvajecca ŭ rasijskaj vajennaj pramysłovaści.

Tak, biełaruski zavod pastaŭlaje dla rasijskaj abaronki šasi dla apieratyŭna-taktyčnych rakietnych kompleksaŭ (ATRK) «Iskander», reaktyŭnyja sistemy załpavaha ahniu (RSZA) «Urahan», «Śmierč», «Hrad», «Tarnada» ŭsich madyfikacyj, kołavyja (ekspartnyja) varyjanty zienitna-rakietnych kompleksaŭ supraćpavietranaj abarony «Tor» i «Buk», zienitnych rakietnych sistem SPA S-300 i S-400. Usie mabilnyja rakietnyja kompleksy rakietnych vojskaŭ stratehičnaha pryznačeńnia RF pracujuć na šasi MZKC.

Ale ŭvosień Ministerstva abarony RF płanavała vyrašyć pytańnie pa pieravodzie sistem uzbrajeńniaŭ rasijskaj armii na šasi ajčynnaj vytvorčaści. Papiarednie byŭ abrany Branski aŭtamabilny zavod (BAZ), kudy płanavałasia pierakinuć z MZKC bolšuju častku zakazaŭ na śpiecyjalnyja kołavyja šasi, pierš za ŭsio dla takich sistem, jak ATRK «Iskander» i RSZA.

Akramia taho MAZaŭskija mašyny mierkavałasia zamianić technikaj, što vypuskajecca BAZam i KAMAZam.

Adnak, pavodle acenak vysokapastaŭlenaj krynicy «Iźviestij» u Minabarony, zamianić minskija ciahačy adrazu nie atrymajecca: pradukcyja branskaha zavoda adnosicca da bolš lohkaj vahavaj katehoryi — da 40 t, a pradukcyja KAMAZa jašče znachodzicca na stadyi ekśpierymientalnych uzoraŭ. Dastatkova šmat pretenzij i da hruzavikoŭ KAMAZa, što pastaŭlajucca ŭ vojski: masavaja vytvorčaść pakul nie naležnaj jakaści, kaža surazmoŭca haziety.

Jak adznačaje vice-prezident Centra stratehičnych kamunikacyj Dźmitryj Abzałaŭ, inicyjatyva biełaruskaha boku nie zusim efiektyŭnaja. Sajuz z takimi pradpryjemstvami, jak chołdynh «Ałmaz-Antej», nie pryciahnie novych zakazčykaŭ, i kankurentazdolnaść sumiesnaj pradukcyi ŭpadzie. Zastaniecca top-menedžment MAZa ŭ ciapierašnim farmacie, ale Minski aŭtamabilny zavod pry hetym moža spynić pracu. Ciapier pieradumovy da hetaha ŭžo jość, bo ŭ dziaržavy niama hrošaj układvacca ŭ jaho madernizacyju, a patrebny praryŭ, adznačaje ekśpiert.

Pry hetym Dźmitryj Abzałaŭ nahadvaje, što KAMAZ — samy efiektyŭny aŭtazavod u Rasii na siońniašni dzień: jon maje stabilny rynak zbytu i atrymlivaje prybytak biez udziełu dziaržinviestycyj.

Krynica va ŭradzie adznačyła, što chutčej za ŭsio rasijskim čynoŭnikam udasca ŭhavaryć biełaruskich kalehaŭ pryniać prapanovu KAMAZa.

— Tym bolš što ŭ sakaviku stvareńnie rasijska-biełaruskaha chołdynhu było anansavanaje na samym vysokim uzroŭni. Pra jaho zajaviŭ prezident Rasii Uładzimir Pucin u Sankt-Pieciarburhu paśla pieramovaŭ z prezidentam Respubliki Biełaruś Alaksandram Łukašenkam, — padkreśliŭ jon.

Tady ž ministr pramysłovaści i handlu Rasii Dzianis Manturaŭ zajaŭlaŭ, što ŭžo da siaredziny krasavika baki pavinnyja vyznačyć schiemu kiravańnia chołdynham.

— Heta budzie asobnaja kiroŭnaja kampanija, jakaja pavinnaja ŭziać na siabie funkcyi kiravańnia dvuma vytvorčymi abjadnańniami KAMAZa i MAZa, — skazaŭ ministr.

izvestia.ru

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH