Minzdaroŭja: Vyjaŭleńnie ŭ Biełarusi virusa A(H1N1) nie pavinna vyklikać paniku 1

Vyjaŭleńnie ŭ Biełarusi virusa, A(H1N1), jaki dva hady tamu pryvioŭ da pandemii, nie pavinna vyklikać paniku. Pra heta zajaviła hałoŭny epidemijołah Ministerstva achovy zdaroŭja Ina Karaban 9 studzienia na pres-kanfierencyi ŭ Minsku.

Pavodle jaje słoŭ, choć virus i praciahvajuć zvać pandemičnym, siońnia nie idzie havorka pra toje, «što jon strašny». Virus cyrkuluje ŭžo treci siezon, u tym liku i letaś, kali ŭ Biełarusi nie było navat epidemii hrypu. Akramia taho, jon uklučany ŭ skład vakcyny, tamu hramadzianie, jakija zrabili pryščepku, zaścierahli siabie. «Luby hryp, viadoma, kavarny pa-svojmu, i, zrazumieła, nieabchodna vykonvać usie miery prafiłaktyki, i asabliva važnaj źjaŭlajecca vakcynaprafiłaktyka», — padkreśliła Karaban.

Hałoŭny pazaštatny śpiecyjalist Ministerstva achovy zdaroŭja pa infiekcyjnych chvarobach Ihar Karpaŭ taksama zaklikaŭ nasielnictva spakojna stavicca da taho, što ŭ Biełarusi vyjaŭleny, A(H1N1).

«Hety hryp zaviecca pandemičnym pa starym zvyčai, ale na samoj spravie heta siezonny hryp. Virus u hetaj situacyi pavodzić siabie ŭžo pa-inšamu», — skazaŭ jon.

Adkazvajučy na pytańnie pra mahčymaść uźniknieńnia novych niebiaśpiečnych virusaŭ hrypu, jakija pieranosiacca žyviołami, Karpaŭ adznačyŭ, što «šerah virusałahičnych padziej» moža adbyvacca pry vialikaj kolkaści vadapłaŭnych ptušak. Ad ich novyja virusy mohuć pieradavacca inšaj žyviole. Adnak śpiecyjalisty-virusołahi pa ŭsim śviecie adsočvajuć pracesy hiennych źmienaŭ virusaŭ i pry nieabchodnaści svoječasova infarmujuć miedykaŭ.

Treba adznačyć, što 8 studzienia ŭ Ministerstvie achovy zdaroŭja zajaŭlali, što ŭ Biełarusi pakul nie vyjaŭlena vypadkaŭ hrypu, A(H1N1).

Na siońniašniaj pres-kanfierencyi zahadčyca adździaleńnia imunaprafiłaktyki Respublikanskaha centra hihijeny, epidemijałohii i hramadskaha zdaroŭja Vieranika Šymanovič paviedamiła, što u tych, chto zachvareŭ u Biełarusi, vyznačajecca jak virus hrypu A(H3N2), tak i A(H1N1), a taksama virusy hrypu B.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH