Ministr abarony Hiermanii Tomas de Meźjer paśla narady ŭ zamiežnapalityčnym viedamstvie krainy pryniaŭ rašeńnie zakryć štab vajskovaha ataše pry pasolstvie FRH u Minsku. Usie supracoŭniki aparata byli adklikanyja ź biełaruskaj stalicy ŭ niadzielu, 2 śniežnia. Pavodle infarmacyi ahienctva DPA, ułady Hiermanii paličyli niemahčymym dalejšaje vajskovaje supracoŭnictva z režymam Alaksandra Łukašenki ŭ suviazi z šmatlikimi vypadkami parušeńnia pravoŭ čałavieka ŭ Biełarusi.
Rašeńniu pa spynieńni misii vajskovaha ataše ŭ Minsku papiaredničali dypłamatyčnyja kroki abiedźviuch krain. U vieraśni 2012 hoda ŭrad Hiermanii kanstatavaŭ adsutnaść prahresu ŭ Biełarusi ŭ pytańni pieraśledu inšadumcaŭ i abmiežavaŭ vajskovaje supracoŭnictva. U adkaz Minsk zusim spyniŭ kaapieracyju z bundeśvieram, paviedamlaje Deutsche Welle.
Stvorany ŭ 1993 hodzie aparat vajskovaha ataše pasolstva Hiermanii ŭ Minsku naziraŭ za pracesami raźvićcia i refarmavańnia biełaruskaj armii i jaje uzajemadziejańniem z uzbrojenymi siłami inšych dziaržaŭ i mižnarodnych struktur biaśpieki — SND, NATA, ABSIE i AAN. Taksama jon padavaŭ biełaruskamu ministerstvu abarony infarmacyju pa vajskovych pytańniach, što tyčacca Hiermanii.
