«KDB — karny orhan z łancuhom złačynstvaŭ». Rada BNR prakamientavała ŭniasieńnie ŭ śpis ekstremisckich farmavańniaŭ
«Rada Biełaruskaj Narodnaj Respubliki pryniała da viedama infarmacyju ab svaim uklučeńni ŭ śpis «ekstremisckich farmavańniaŭ» z boku KDB Respubliki Biełaruś — karnaha orhana, za jakim jašče z časoŭ Lenina ciahniecca łancuh złačynstvaŭ i teroru suprać biełaruskaha naroda», — havorycca ŭ zajavie Rady.
Staršynia Rady BNR Ivonka Surviła i Śviatłana Cichanoŭskaja
Hetaje rašeńnie, pryniataje niezakonnaj złačynnaj arhanizacyjaj, jakoju jość KDB RB, nijakim čynam nie paŭpłyvaje na dalejšuju dziejnaść Rady BNR, jakaja budzie praciahvać pradstaŭlać suvierennyja pravy biełaruskaha naroda‚ vyjaŭlenyja ŭ pravatvorčym Akcie 25 Sakavika 1918 h. i zafiksavanyja Treciaj Ustaŭnoj Hramataj BNR, jak paviedamlaje Rada.
«Rada BNR zajaŭlaje, što aŭtarytarny palityčny režym, jaki ŭstalavaŭsia ŭ Biełarusi ŭ vyniku dziaržaŭnaha pieravarotu 1995-1996 hh. i ŭzurpacyi ŭłady z boku hrupy asobaŭ na čale z byłym prezidentam A. Łukašenkam, nielehitymny i nie maje prava pramaŭlać ad imia naroda Biełarusi», — padkreślivaje Rada BNR.
***
Rada Biełaruskaj Narodnaj Respubliki — najstarejšaja biełaruskaja palityčnaja i dziaržaŭnaja instytucyja ŭ emihracyi. Jaje zasnavali ŭ lutym 1918 hoda ŭ Minsku. Z 1920 hoda znachodzicca ŭ emihracyi.
U Radu ciapier uvachodziać 80 siabroŭ, jakija pradstaŭlajuć biełaruskija arhanizacyi z 15 krain: Aŭstralii, Bielhii, Vialikabrytanii, ZŠA, Kanady, Łatvii, Litvy, Niamieččyny, Polščy, Rasii, Ukrainy, Francyi, Čechii, Šviecyi, Estonii. Kožnyja dva hady Rada BNR pravodzić siesii, pamiž jakimi pastajannym dziejnym orhanam zastajecca Prezidyum Rady. Z 1997 hoda staršynioj Rady BNR zastajecca Ivonka Surviła.
Čytajcie taksama:
P.S.: repietycyjaj razhonu Ŭsierasiejskaha Ustanoŭčaha Schodu možna ličyć razhon prarasiejskimi kałłabarantami pry padtrymcy vojskaŭ RSFSR ŭ śniežni 1917h.