Kipr i Malta anulavali «załatyja pašparty» dziasiatkaŭ hramadzian Rasii i Biełarusi
Ułady Kipra i Malty na fonie ciapierašniaj situacyi va Ukrainie anulavali tak zvanyja «załatyja pašparty» niekalkich dziasiatkaŭ hramadzian Rasii i Biełarusi, jakija trapili ŭ sankcyjnyja śpisy Jeŭrasajuza, piša «Jeŭrapiejskaja praŭda».
Pašpart Malty. Fota ilustracyjnaje
Pra heta havorycca ŭ adkazie Jeŭrapiejskaj kamisii na zapyt deputata Jeŭraparłamienta ad Svabodnaj demakratyčnaj partyi Niamieččyny Moryca Kiorniera, jaki akazaŭsia ŭ rasparadžeńni niamieckaha vydańnia Spiegel.
Pa infarmacyi Jeŭrakamisii, Kipr pazbaviŭ «załatych pašpartoŭ» dzieviaciarych rasijan i 34 členaŭ ich siemjaŭ praz toje, što jany patrapili pad sankcyi, uviedzienyja ES z-za ahresiŭnaj vajny Rasii suprać Ukrainy. Malta zabrała pašparty ŭ dvaich čałaviek.
U kamientary Spiegel Kiornier vitaŭ dziejańni Kipra i Malty. «Rasijanie i biełarusy, jakija traplajuć u sankcyjny śpis ES, nie zasłuhoŭvajuć hramadzianstva Jeŭrasajuza», — skazaŭ palityk.
Kipr i Malta, jak i niekatoryja inšyja krainy Jeŭrapiejskaha sajuza, užo doŭhi čas dajuć svajo hramadzianstva zamiežnym inviestaram u abmien na bujnyja hrašovyja inviestycyi. Uładalniki hetych «załatych pašpartoŭ» karystajucca pieravahami hramadzianstva ES.
Na Kipry dla atrymańnia takoha pašparta treba było inviestavać nie mienš za 2,5 miljona jeŭra. Pa infarmacyi kiprskaha ŭrada, u pieryjad z 2007 pa 2020 hod było takim čynam pryciahnuta ŭ krainu kala 9,7 miljarda jeŭra.
Paśla napadu Rasii na Ukrainu Jeŭrakamisija znoŭ abviaściła supiarečlivuju praktyku niezakonnaj i rekamiendavała krainam ES razhledzieć mahčymaść skasavańnia takoha hramadzianstva — asabliva kali ludzi znachodziacca ŭ sankcyjnych śpisach ES abo padtrymlivajuć ahresiŭnuju vajnu Rasii.
Čytajcie taksama:
U tych, chto vyjazdžaje za miažu bieź vizy, pačali patrabavać pakazvać DNŽ. Što viadoma
Chvala emihracyi ŭ 2021—2023 hadach — samaja vialikaja ŭ historyi Biełarusi. Ličby
Amal try tysiačy biełarusaŭ atrymali ŭ minułym hodzie hramadzianstva Polščy
