Pałkoŭnik Rashvardyi nazyvaŭ napad na Ukrainu ahresijaj i akupacyjaj. Jaho aryštavali i sudziać
Rasijski telehram-kanał «Dva majora» paviedamlaje, što vajskovaja kontrvyviedka vyjaviła «praciŭnika SVA» ŭ Rashvardyi. Sud pa spravie pałkoŭnika Valeryja Katoviča prachodzić u Rastoŭskim-na-Donie harnizonnym vajennym sudzie. Jaho abvinavačvajuć u raspaŭsiudžvańni zaviedama iłžyvaj infarmacyi ab vykarystańni Uzbrojenych sił RF.
Jak paviedamlaje telehram-kanał, pałkoŭnik Katovič paśla pačatku tak zvanaj SVA nazyvaŭ rasijskich vajskoŭcaŭ akupantami i ahresarami, u jaho pačalisia kanflikty ź inšymi supracoŭnikami.
Va Ukrainie ŭ jaho brat i inšyja svajaki.
Valeryj Katovič rodam z Ukrainy, paviedamlaje kanał. Skončyŭ Charkaŭski vajenny instytut MUS i słužyŭ va ŭnutranych vojskach Ukrainy na terytoryi Kryma. U 2014 hodzie atrymaŭ rasijskaje hramadzianstva i pastupiŭ na słužbu ŭ pravaachoŭnyja orhany RF. Z 2020 hoda słužyć u Paŭdniovym centry materyjalna-techničnaha zabieśpiačeńnia Rashvardyi na pasadzie načalnika addziełu zakupak.
Aŭtary kanała namiakajuć, što Katovič, zjaŭlajučysia supracoŭnikam tyłavoha padraździaleńnia, sabatavaŭ svaje naležnyja abaviazki, u vyniku čaho «zaciahvalisia terminy pastaŭki materyjalnych srodkaŭ i praduktaŭ charčavańnia dla padraździaleńniaŭ na froncie».
