Što Łukašenka choča ad Pucina? Imaviernaja pryčyna budučaha vizitu ŭ Rasiju
Siońnia Alaksandr Łukašenka sazvaniŭsia z Uładzimiram Pucinym. Damovilisia sustrecca ŭ śniežni dla abmierkavańnia ekanomiki. Što ž treba Łukašenku?
Fota: Dmitry Azarov, Sputnik, Kremlin Pool Photo via AP
Ekanamist Dźmitryj Kruk, staršy navukovy supracoŭnik BEROC, miarkuje, što hałoŭnaj temaj sustrečy budzie cana na haz dla Biełarusi.
«Cana na haz nie ŭzhodnienaja i pa siońnia. A zaraz heta vielmi istotnaje pytańnie, bo mienavita nizkaja cana na haz była adnym z hałoŭnych faktaraŭ kankurentazdolnaści biełaruskich pradpryjemstvaŭ, asabliva bujnych. Najpierš dla «Hrodna Azota» — heta krytyčna važna».
Dźmitryj Kruk
Letam cana dla Jeŭropy dasiahała 2000 dalaraŭ za tysiaču kubamietraŭ, ciapier jana składaje 1000 dalaraŭ.
Biełaruś ža płacić u rasijskich rublach canu, ekvivalentnuju 128 dalaram za tysiaču kubamietraŭ. Heta vielmi nizki ŭzrovień, u razy mienšy za ceny dla Jeŭropy.
Tamu, ličyć ekanamist, cana na haz budzie pytańniem numar adzin na budučaj sustrečy Łukašenki i Pucina.
Ci budzie Łukašenka prasić naŭprost hrošaj? Pakul niezrazumieła, miarkuje Kruk. Ale mahčyma.
«Apošniaje, što było — 1,5 miljarda dalaraŭ ad Rasii na impartaźmiaščeńnie, ale hetuju sumu ŭzhadnili, jana navat adlustravanaja ŭ prajekcie biudžetu Biełarusi, — nahadvaje ekanamist. — Praŭda,
u biudžecie staić ličba ŭ 2 miljardy. Adkul voźmucca tyja dadatkovyja 500 miljonaŭ? Napeŭna, taksama z Rasii, prynamsi, ja nie baču pakul inšych krynic. Heta nie takaja istotnaja suma, ale značeńnie taksama maje.
Taksama, moža, budzie razmova i pra dostup da rasijskaha rynku pazykaŭ praź dziaržaŭnyja ablihacyi. Nu i tradycyjna moža budzie havorka pra dostup na rasijski rynak, ale tam dla biełarusaŭ usio dobra, asabliva na fonie sychodu z Rasii zamiežnych vytvorcaŭ».
