Daražej, čym pa Mižziemnym mory. Na Paleśsi jość račny kruiz, kvitki na jaki nie dastać
Ceny kusajucca, ale popyt vialiki.
Fota: Kruiz Anłajn
U minułym hodzie adnavili kruiz na ciepłachodzie «Biełaja Ruś» pa maršrucie Brest — Mazyr. Maršrut kruizu pa rekach Muchaviec, Pina i Prypiać i Dniaproŭska-Buhskim kanale. Turysty mohuć naviedać Brest, Pinsk, Kobryn, Turaŭ, Naroŭlu. U prahramu ŭklučany dziesiać ekskursij, piša BGMedia.
Trochpałubny ciepłachod stvarali šeść hadoŭ. U jaho pieraabstalavali techničnaje sudna. Na borcie 16 kajut roznych katehoryj, raźličanych na 30 pasažyraŭ. Na vierchniaj pałubie raźmiaščajecca panaramny restaran, bar i placoŭka dla adpačynku z kanapami i stolikami. Kuchary rychtujuć stravy biełaruskaj i inšych kuchniaŭ śvietu. Charčavańnie praduhledžvajecca čatyrochrazovaje.
Ciepłachod spuścili na vadu ŭ Pinsku ŭ 2017-m. U 2023-m adnavili rehularnyja kruizy. Letaś samy tanny bilet kaštavaŭ 1453 rubli. A jak iduć spravy ŭ 2024-m?
Košt pytańnia
Na sajtach turahienctvaŭ ceny ŭ bolšaści vypadkaŭ pakazvajuć u rasijskich rublach. Tak, samy tanny kvitok na 8 dzion i 7 načej kaštuje 64 401₽ (2 255 BYN). Choć jašče ŭ minułym hodzie cana była 1692 BYN, što na 33% tańniej. Samaja darahaja kajuta katehoryi «luks» na ciepłachodzie abydziecca ŭ 5540 BYN. U minułym hodzie ceńnik taksama byŭ nižejšy — 4 000 BYN.
Košt zaležyć ad vidu maršrutu, a ich usiaho try. Dva ŭ adzin bok — «Začaravańnie Paleśsia»: Mazyr — Brest i Brest — Mazyr, a taksama kruhavy kruiz «Skarby Paleśsia» z adpraŭleńniem i viartańniem u Brest.
Adnak, kvitkoŭ na travień užo niama — jany dastupnyja tolki ź siaredziny červienia. A padarožničać u kajucie kłasa «luks» atrymajecca tolki ŭ žniŭni. Vychodzić, niahledziačy na vielizarny, pa biełaruskich mierkach, ceńnik, popyt na račny kruiz jość.
Pa vodhukach klijentam padarožža vielmi spadabałasia. Chtości rekamiendavaŭ hety ciepłachod usim, «chto šukaje kamfortny i pryjemny kruiz», chtości zakazvaŭ kruiz dla baćkoŭ, i «mama z baćkam zastalisia zadavolenyja na ŭsie sto pracentaŭ».
Paraŭnalna z cenami marskich kruizaŭ u Jeŭropie?
Vydańnie pahladzieła, kolki kaštujuć marskija kruizy. Kvitki na kruiz zvyčajna ŭklučajuć pražyvańnie, charčavańnie, niekatoryja napoi i zabaŭki. Pasažyry mohuć dapłačvać za firmovyja stravy, ałkaholnyja napoi, čajavyja, spa-pasłuhi, kazino, Wi-Fi, avijabilety, tranśfiery i ekskursii.
Vaśmidzionny kruiz pa Mižziemnym mory pa maršrucie Marsel — Palma-de-Majorka — Valensija — Kaljary — Čyvitaviekja — Livorna — Marsel kaštuje 459 jeŭra z prahramaj all inclusive. Heta ekvivalentna 1610 rublam, što na 40% tańniej za samy biudžetny varyjant na račny kruiz z Bresta ŭ Mazyr.
Krychu daražej (494 jeŭra abo 1722 rubli) kaštuje vaśmidzionny kruiz pa Mižziemnym mory pa maršrucie Marsel — Hienuja — Nieapal — Miesina — Valeta — Barsiełona — Marsel.
Čytajcie taksama:
«Zajmajusia dziciem, piaku pirahi». Jak mužy ajcišnic siadziać doma
Butelka praseka ŭ restaranie — 210 dalaraŭ. Viadučaja BT raspaviała pra košt adpačynku ŭ Katary
