«Латушка фальсіфікаваў у пасольстве, камбрыг Сахашчык — у сябе» — Саннікаў патлумачыў свае прэтэнзіі да лідараў
У інтэрв'ю «Рацыі» Андрэй Саннікаў абгрунтаваў, чаму нельга адмяняць санкцыі, расказаў, чаму не бярэ ўдзелу ў акцыях па спыненні экспарту Беларусі і за што крытыкуе Ціханоўскую і яе атачэнне.
Адрэй Саннікаў. Фота: «Голас Амерыкі»
Падчас размовы было закранута пытанне адмены санкцый у абмен на вызваленне палітзняволеных. Па словах Саннікава, з такой ініцыятывай выступае «група вакол Ціханоўскай».
Па словах палітыка, цяпер санкцыі працуюць не да канца. «Зерне ідзе. Польшча і Літва — самыя жорсткія крытыкі рэжыму Лукашэнкі. З імі таваразварот у Беларусі на першых месцах у Еўропе. Пакуль не будуць закрытыя гэтыя дзіркі, не пачнуць працаваць сапраўдныя санкцыі, нельга пра іх казаць. Гэта такі аргумент, які мы чуем кожны раз, калі яны (краіны Захаду — «НН») уводзяць санкцыі.
Увялі санкцыі, яны папрацавалі два гады, а потым прапаноўваюць іх зняць. Гэта тое, што і Пуцін, і Лукашэнка добра ведаюць. Што Захад стоміцца ад сваіх жа санкцый і пачне іх здымаць. Нельга зараз гэтага дапускаць».
Чаму не далучаецца да акцый па ўзмацненні санкцый?
Цяпер у Варшаве каля ўрадавых будынкаў праводзяцца акцыі з заклікам да польскіх уладаў перакрыць экспарт Беларусі. Але Саннікаў у іх не бярэ ўдзелу. Чаму ён не далучаецца?
«Я пакуль што не бачу алгарытму, які будзе працаваць. Я не супраць гэтай акцыі. Але я не буду далучацца. Таму што, па-першае, я іншым займаюся. Па-другое, у мяне ёсць «Еўрапейская Беларусь». Мы абмяркоўвалі, што для нас прыярытэт.
Па-трэцяе, спробы па перакрыцці руху, што былі, ні да чаго не прывялі. Былі нейкія піяр-акцыі. Таму, калі я размаўляў з арганізатарамі акцый, я сказаў, што трэба нейкія дамоўленасці з польскім бокам. Зараз гэта адбываецца»
Чаму праігнараваў канферэнцыю «Шлях да Волі»
Саннікаў адзначыў, што яго запрашалі на канферэнцыю «Шлях да Волі», якая адбылася ў Кіеве ў канцы лістапада 2023 года. Па словах палітыка, канферэнцыя была не кансалідацыяй, а спробай пэўных людзей, якіх ён не захацеў называць, «пусціць пыл у вочы, паказаць, вось мы тут стварылі цэнтр, які будзе ўсім кіраваць.
А хто кіраваў [канферэнцыяй]? Украінцы. Якія ў мяне даверу не выклікалі, таму што сярод іх былі тыя, хто патрабаваў рэпарацый ад Беларусі. Ну, як я магу там удзельнічаць? Я не магу ўдзельнічаць у тым, у чым я не працаваў з самага пачатку і чаго я не разумею».
За што крытыкуе Ціханоўскую і яе атачэнне
Саннікаў звяртае ўвагу, што Латушка падчас сваёй працы паслом Беларусі ў Польшчы быў старшынёй выбарчай камісіі на ўчастку, які размяшчаўся на тэрыторыі пасольства. І такім чынам удзельнічаў у фальсіфікацыі выбараў — злачынстве, якое не мае тэрміну даўніны.
«Старшыня выбарчай камісіі адказвае за лічбы і ён — першая, а можа і галоўная інстанцыя, якая фальсіфікавала выбары. Латушка фальсіфікаваў, камбрыг Сахашчык — у сябе фальсіфікаваў.
І калі вось атачэнне складаецца з людзей, якія гэты рэжым стварылі, як я магу думаць, што нейкія змены з імі могуць быць звязаныя? Яны забяспечылі паразу рэвалюцыі і зараз робяць усё, каб нічога не адбывалася ў Беларусі».
«Дарэчы, той чалавек, які цяпер займаецца пашпартам, ён сам прызнаўся, што два разы працаваў у камісіі, якая фальсіфікавала выбары. Кавалеўскі. Ну што такое пашпарт? Як можна людзям хлусіць? Ну нічога не будзе з гэтага», — дадае Саннікаў і працягвае:
«Але гэтая сетка, раскінутая праз план «Перамога», «Рабочы рух», розныя «Галасы», розныя боты, «Кадравыя рэзервы», той жа пашпарт, падстаўляе людзей. Мы ж ведаем, што арышты адбываюцца ў Беларусі. І што б яны не адмаўлялі, гэта ўсё звязана з іх дзейнасцю. Вы чулі, каб яны папрасілі прабачэння? Яны ж усё адмаўляюць. Я не магу маўчаць у гэтай сітуацыі. Дайце мне вынікі».
Саннікаў сцвярджае, што яго крытыка часам працуе: «Часам пачынаюць нешта рабіць пад уплывам маёй крытыкі».
Чытайце яшчэ:
Халіп пра Саннікава, Ціханоўскую і катлеты: Гэта выключна пра ежу, бываюць такія дзіўныя супадзенні
Саннікаў — журналістцы «Дойчэ Веле»: Гэта абавязковыя пытанні, якія вам куратары кажуць задаваць?
