Святлана Ціханоўская падчас выступу ў Еўрапарламенце. Верасень 2023 года. Фота: Офіс Святланы Ціханоўскай
«Рэжым [Аляксандра] Лукашэнкі шукае любую слабасць у нашым адзінстве, але не можа быць ніякіх угодаў з дыктатарам, які мае дачыненне да ваенных злачынстваў, выкрадання ўкраінскіх дзяцей і тэрору супраць уласнага народа», — напісала палітык на сваёй старонцы ў X.
Заклік Ціханоўскай з’явіўся на фоне апошніх заяў Лукашэнкі на адрас краін Еўрапейскага саюза, танальнасць якіх можна назваць прымірэнчай, звяртае ўвагу «Позірк»
26 кастрычніка Лукашэнка павіншаваў народ Аўстрыі з Днём прыняцця закона аб пастаянным нейтралітэце, заявіўшы пра ўстойлівую супрацу аўстрыйцаў і беларусаў, «нягледзячы на актыўныя спробы звонку пабудаваць бар’еры і сцены». «Упэўнены, што няпростыя часы мінуць і мы з патроенай сілай адновім узаемадзеянне і прымножым на карысць абедзвюх краін і еўрапейскага кантынента ўсе дасягненні, напрацаваныя і назапашаныя за апошнія дзесяцігоддзі», — адзначыў ён у пасланні.
У той жа дзень на сустрэчы з міністрам замежных спраў і знешняга гандлю Венгрыі Петэрам Сіяртам у Мінску Лукашэнка чарговы раз назваў сябе «зацятым прыхільнікам» захавання Еўрасаюза. Паводле яго слоў, ЕС «разам з ЗША, Кітаем, Расіяй, у нейкай ступені Індыяй з’яўляюцца моцнымі апірышчамі існавання нашай планеты».
Падчас наведвання Мінскага раёна 27 кастрычніка Лукашэнка пахваліў палякаў за галасаванне на нядаўніх выбарах, вынікі якіх, верагодна, дазволяць апазіцыі сфармаваць парламенцкую большасць і ўзначаліць урад.
Акрамя таго, ён заявіў, што Беларусь «настроеная на мір з усімі суседзямі і іншымі краінамі і не жадае ваяваць».
Віншуючы чэхаў з Днём дзяржаўнасці 28 кастрычніка, Лукашэнка выказаў меркаванне, што Мінск і Прага сёння маюць магчымасці для «аднаўлення канструктыўнай супрацы ў гандлёвай і гуманітарнай сферах». «Беларускі бок да гэтага гатовы», — адзначыў ён.
Чытайце таксама:
Лукашэнка намякнуў, што гатовы гаварыць з палякамі
Лукашэнка сказаў, што ён заўзяты прыхільнік ЕС
Кіраўнік МЗС Венгрыі: Мы заўсёды будзем захоўваць каналы камунікацыі з Беларуссю
