Нацыянальны парк «Саксонская Швейцарыя». Скрыншот відэа tuturysty / YouTube
На ютуб-канале маладых людзей ёсць відэа пра Мадэйру, Гёрліц, Капенгаген, Прагу. Відэа невялікія, але змястоўныя і цікавыя. І галоўнае — з душой.
У апошнім відэа Сяргей і Лена распавядаюць пра нацыянальны парк «Саксонская Швейцарыя», які знаходзіцца ў Германіі недалёка ад Дрэздэна, зусім побач мяжы з Чэхіяй. Парк вядомы дзякуючы ўнікальным скалам з пясчаніку. Шыкоўнае месца для пешага паходу выхаднога дня.
Маладыя людзі спыніліся ў кемпінгу, у якім ёсць усё неабходнае для камфортнага адпачынку — ад разетак, рукамыйнікаў, невялікай электрапліты да душа.
Сяргей паказвае кемпінг, на тэрыторыі якога яны спыніліся з палаткай. Скрыншот відэа tuturysty / YouTube
Адтуль яны выправіліся на мост Бастай, пабудаваны з пясчаніку ў XIX стагоддзі. З яго адкрываецца цудоўны від на пясчаныя скалы, якім больш за 80 мільёнаў гадоў. Гэта адна з найпрыгажэйшых назіральных пляцовак Еўропы.
Мост у скалах. Скрыншот відэа tuturysty / YouTube
У даліне паміж скаламі працякае Эльба. А ў скалах у Сярэднявеччы размяшчаўся замак Нойратэн. Першая згадка аб ім адносіцца да XIII стагоддзя. Цяпер на яго месцы — музей пад адкрытым небам.
На пароме маладыя людзі патрапілі ў невялікі горад Бад-Шандау, адкуль выправіліся па пешым маршруце ў Нацыянальны парк «Саксонская Швейцарыя», які таксама ўваходзіць у вялікі маршрут «Шлях Лютэра», звязаны з жыццём і дзейнасцю ініцыятара Рэфармацыі Марціна Лютэра.
Сяргей каля помніка Марціну Лютэру. Скрыншот відэа tuturysty / YouTube
Як адзначае Сяргей, маршрут пралягае ў цясніне паміж скал, і навакол вельмі прыгожыя краявіды. Па яго словах, самае папулярнае слова падчас маршруту было «Ваў!». Саксонская Швейцарыя — сапраўдны топ вандровак маладых людзей.
Так выглядае частка турыстычнай сцежкі. Скрыншот відэа tuturysty / YouTube
Як усім пачаткоўцам, для маладых людзей важныя падтрымка і зваротная сувязь. Таму глядзіце і пакідайце каментары.
Чытайце яшчэ:
Як падманваюць турыстаў у Італіі
Каб вандроўка не ператварылася ў сваркі: як паводзіць сябе, калі падарожнічаеш у кампаніі
