У цэнтры Вільні на інтэрактыўным стэндзе паказалі Байдэна, які нібыта ўпаў у аэрапорце
У панядзелак у Вільні на адным з інтэрактыўных рэкламных стэндаў на вуліцы Пілес (Замкавай) з'явіўся відэаролік з нібыта падзеннем прэзідэнта ЗША Джо Байдэна пры выхадзе з самалёта пасля яго прыбыцця ў сталіцу Літвы. Паліцыя расследуе абставіны гэтага магчымага кіберінцыдэнту, як піша Delfi.
Джо Байдэн і Гітанас Наўседа каля прэзідэнцкага палаца ў Вільні. 11 ліпеня 2023 года. Фота: Susan Walsh / AP
Прадстаўнік Дэпартамента паліцыі Рамунас Матаніс пацвердзіў агенцтву ELTA, што ў паліцыю паступіла паведамленне пра гэты інцыдэнт.
«Такі выпадак зарэгістраваны сёння ноччу, стэнд адключаны, абставіны высвятляюцца», — сказаў прадстаўнік паліцыі.
Джо Байдэн прыбыў у Вільню ў панядзелак увечары, напярэдадні саміту НАТА. Але сітуацыі, пры якой лідар ЗША спатыкнуўся б пры выхадзе з самалёта, не было.