На вэб-сайце галасаванкі прадстаўленыя 503 варыянты талісманаў, якія даслалі на конкурс. Самыя папулярныя варыянты талісманаў — жывёлы-хакеісты. У асноўным гэта мядзведзі, барсы, тыгры.
Сустракаюцца і даволі дзіўныя персанажы. Напрыклад, дэльфін-хакеіст Цімошка, Бярозка Метэор, Хахуля Хакуля, Матылёк «Наперад да перамогі» з расійскім трыкалорам на крылах, двухгаловы крылаты МоскаПітэк (Мядзведзязаўр), Чырвоная Машына, якая насамрэч з'яўляецца чырвонай машынай без намёка на дачыненне да хакею, і гуллівага выгляду Руская Дзяўчына.
Трэба адзначыць, што карыстальнікі сеціва творча падышлі да выбару маскота і вырашылі «патроліць» арганізатараў Чэмпіянату.
Абсалютным лідарам галасавання з'яўляецца Зайка Хакеіст — заяц з клюшкай, намаляваны ў лепшых традыцыях paint-прымітывізму. Зайка Хакеіст ужо набраў больш за 124 тысячы праглядаў.
Кожны наведвальнік можа аддаць свой голас дваццаці талісманам. Інтэрнэт-галасаванне за талісман скончыцца 16 сакавіка.
Зайка Хакеіст (другі злева ў верхнім шэрагу) — лідар галасавання.