Супрацоўнікі міліцыі Мінскага аддзела ўнутраных спраў на транспарце затрымалі за хуліганства двух маладых людзей.
Падчас паездкі ў электрацягніку, які рухаўся па маршруце Мінск — Стоўбцы, нецвярозым хлопцам вельмі не спадабаліся месцы для сядзення. Прычым не спадабаліся настолькі, што яны пачалі вырываць з мацаванняў мяккія часткі канструкцый і выкідваць іх у акно.
Такім чынам было пашкоджана больш за 20 пасажырскіх сядзенняў. Агульны ўрон ацэнены ў Br15 млн.
19-гадовы затрыманы, беспрацоўны жыхар Мінскага раёна, раней судзімы за крадзяжы. Яго 21-гадовы таварыш працуе слесарам на адным з прадпрыемстваў у горадзе Дзяржынску Мінскай вобласці. Маладыя людзі патлумачылі свае паводзіны алкагольным ап'яненнем.
Па факце хуліганскіх дзеянняў праводзіцца праверка.