Тэлевізійшчык 1985 года нараджэння падчас сутачнага дзяжурства 13 красавіка ўнёс змены ў плэй-ліст, зачыніў дзверы апаратнай, зламаўшы ў замку ключ, і збег. Відэа было выстаўлена на прайграванне тройчы, яго выпуск быў спынены на 12-й хвіліне паказу.
Аб падрабязнасцях затрымання відэаінжынера БелМузТВ, які паставіў у дзённым эфіры тэлеканала 13 красавіка порнаролік, распавёў намеснік начальніка Упраўлення па наркакантролі і супрацьдзеянні гандлю людзьмі КМ МУС Сяргей Колтун.
Падчас агляду месца здарэння міліцыяй былі канфіскаваныя сам відэазапіс, пляшка піва і пачак цыгарэт. Пасля ўцёкаў мабільнік відэаінжынер адключыў. Але самае складанае для праваахоўнікаў было не знайсці яго, а зразумець матыў яго ўчынку. Кіраўніцтва аддзела выпуску характарызавала яго як работніка дбайнага,
але прыкладна два месяцы таму ён развёўся са сваёй жонкай і моцна перажываў. Гэтую версію пацвердзілі і сваякі ў Магілёве.
Між тым аператыўнікам стала вядома, што малады чалавек нават выказваў намер скончыць жыццё самагубствам.
Ужо 15 красавіка каля гадзіны ночы маладога чалавека затрымалі ў Магілёве на здымнай кватэры па вуліцы Сіманава. Першымі словамі, якімі затрыманы растлумачыў свой учынак, былі: «Мяне ўсё задзяўбло, і таму я так зрабіў».
Нагадаем, што цяпер у дачыненні да відэаінжынера заведзена крымінальная справа, а тэлеканалу, нягледзячы на прабачэнні перад тэлегледачамі, Міністэрствам інфармацыі вынесена пісьмовае папярэджанне(за давядзенне да ўсеагульнага ведама інфармацыі, распаўсюджванне якой абмежавана або забаронена). Па законе аб СМІ за два такія папярэджанні на працягу года дзейнасць сродкі масавай інфармацыі можа быць спыненая.
Міліцыя папярэджвае, што тым, хто яшчэ не выдаліў порнаролік са сваіх акаўнтаў у сацыяльных сетках, таксама пагражае крымінальная адказнасць за распаўсюд парнаграфіі — да чатырох гадоў пазбаўлення волі.
