Спаленне партрэта Мушарафа
Суд Пакістана выдаў ордар на арышт былога прэзідэнта краіны Первеза Мушарафа, які вярнуўся ў краіну ў сакавіку з добраахвотнага выгнання для ўдзелу ў парламенцкіх выбарах. На радзіме палітыка абвінавачваюць у парушэнні канстытуцыі і незаконных арыштах суддзяў у перыяд свайго кіравання.
Нягледзячы на рашэнне суда ў Ісламабадзе, паліцыі не ўдалося затрымаць Мушарафа, які прысутнічаў на пасяджэнні. Яго ахова забрала проста з будынка. Дзе цяпер знаходзіцца экс-прэзідэнт, невядома. У яго яшчэ ёсць магчымасць падаць апеляцыю на гэтае рашэнне ў Вярхоўны суд.
Падставай для завядзення крымінальнай справы супраць Мушарафа стала ўвядзенне ім рэжыму надзвычайнай сітуацыі ў краіне ў 2007 г., калі Вярхоўны суд адмовіўся прызнаваць яго прэзідэнтам, бо ён адначасова з'яўляўся галоўнакамандуючым арміі.Паводле законаў Пакістана, кіраўнік выканаўчай улады не можа з'яўляцца кіраўніком узброеных сіл краіны. Урэшце Мушараф адмовіўся ад статусу ваеначальніка, аднак гэтаму папярэднічаў канфлікт з суддзямі Вярхоўнага суда і арышт некаторых з іх.
Акрамя гэтага, у дачыненні да Мушарафа выстаўлены яшчэ шэраг абвінавачванняў.У прыватнасці, яго лічаць датычным да забойства былога прэм'ер-міністра краіны і апазіцыянера Беназір Бхута ў 2007 годзе, а таксама да забойства лідара паўстанцаў з Белуджыстана годам раней.
Гэтыя абвінавачванні перашкодзілі Мушарафу, што ўзначальваў краіну з 1999 па 2008 год, прыняць удзел у парламенцкіх выбарах.
Ён спрабаваў падаць заяўкі на рэгістрацыю сваёй кандыдатуры ў чатырох правінцыях, аднак яму было адмоўлена.
0
0
0
0
0
0
