U Pieršamajskim rajonnym sudzie stalicy pačaŭsia razhlad hramadzianskaj spravy sustaršyń partyi Biełaruskaja chryścijanskaja demakratyja Paŭła Sieviarynca i Vitala Rymašeŭskaha suprać Biełteleradyjokampanii i žurnalista Andreja Kryvašejeva.
27 vieraśnia ŭ viečarovym efiry «Panaramy tydnia» na BT vyjšaŭ repartaž Andreja Kryvašejeva, pryśviečany dziejnaści BCHD. Zasnavalniki partyi znajšli dastatkova šmat padstavaŭ, kab źviarnucca ŭ sud z prośbaj abarony honaru i hodnaści, a taksama dziełavoj reputacyi.
Pazoŭniki patrabujuć abviaržeńnie dadzienaj infarmacyi ŭ toj samy čas, kali byŭ pakazany repartaž. A taksama spahnać z telekanała i sp.Kryvašejeva pa 50 miljonaŭ rubloŭ.
Sieviaryniec zaznačyŭ, što puścić hetyja hrošy na pierajmienavańnie vulic u rodnym Viciebsku. «U suviazi ź inflacyjaj sumu možna navat pavialičyć», — zaznačyŭ V.Rymašeŭski.
Praces viadzie sudździa Volha Bahamja. Sam Kryvašejeŭ na sud nie źjaŭviŭsia, jaho intaresy abaraniali pradstaŭniki jurydyčnaha adździełu telekanału.
Častka ludziej na praces spaźniałasia. Sudździa Bahamja na heta skazała: «Zał byŭ śpiecyjalna adkryty raniej, kab vy mahli sieści, dzie vam zručniej». Adkaz z zali: «Dzieci nienavučanyja jašče — mała sudzili».
Sam repartaž prahladzieć nie atrymałasia, bo nie pracavaŭ kamputar.
Sieviaryniec skazaŭ, što pavodle hetaha repartažu jon paŭstaje niejkim «isčadzijem piekła».Siarod inšaha jahonaje abureńnie vyklikali frazy, što podpis źbirajucca šlacham padmanu i machinacyj. Samich siabroŭ BCHD nazyvali «psieŭdapratestantami», raskazvali pra «padpolnuju carkvu, jakaja zabaraniaje prychadžanam sustrakacca z pradstaŭnikam nie svajoj carkvy». Taksama ŭ repartažy havaryłasia, što BCHD nastojvaje na nadańni zvańnia hierojaŭ «dvum dezierciram‑esesaŭcam». Nu i aproč usiaho BCHD «niebiaśpiečnaje dla zdaroŭja».
Pavieł Sieviaryniec adrazu zaznačyŭ, što nie vieryć u spraviadlivy vynik sudu.
Kontrarhumienty pradstaŭnikoŭ BT byli nastupnymi. Pakolki niama takoj jurydyčnaj asoby jak BCHD, to i pazova adpaviedna być nie moža. Materyjał byŭ nie kankretna pra Sieviarynca ci Rymašeŭskaha, a pra ŭsio partyju.
Na pytańnie Sieviarynca, a čamu na ekranie tady ŭvieś čas źjaŭlaŭsia jahony tvar, byŭ nastupny adkaz: «Dyk tam ža nidzie nie padpisana, što heta vaša lico».
Pradstaŭnica telekanała Volha Dubroŭskaja zajaviła, što nijakaj pryviazki pamiž tekstam i karcinkaj niama. Na pytańni pazoŭnikaŭ žančyna adkazvała ź niekatorymi biełaruskimi słovami, a potym dadała:
«Iźvinicie, što pierachodžu na vaš jazyk»
Paśla abieda sudździa Volha Bahamja adchiliła pazoŭ Sieviarynca i Rymašeŭskaha da BT. Nijakich tłumačeńniaŭ pryčynaŭ admovy začytana nie było.
