26 krasavika
Daškieviča viartajuć
Lider niezarehistravanaha «Maładoha frontu» trapiŭ u špital na abśledavańnie sa škłoŭskaj kalonii, dzie jaho prymušali pracavać na lesapilnym učastku, choć jamu baleła śpina. Pierad viartańniem u kaloniju Źmicier mieŭ spatkańnie z baćkami. Nahadajem, Źmicier Daškievič pakarany na paŭtara hodu źniavoleńnia za ŭdzieł u niezarehistravanaj arhanizacyi. Za kratami chłopiec bolej za dzieviać miesiacaŭ.
Zatrymany Chamajda
Barys Chamajda atrymaŭ dvoje sutak aryštu pa art. 23.34 KaAP (parušeńnie paradku arhanizacyi albo praviadzieńnia masavaha mierapryjemstva albo pikietavańnia), bo ŭstalavaŭ u centry Viciebsku nievialički zvon u pamiać Čarnobylskaj trahiedyi j raz‑poraz u jaho zvaniŭ. Pikiet ciahnuŭsia kala dziesiaci chvilinaŭ. Potym milicyjanty dastavili apazycyjanera ŭ Čyhunačny RUUS Viciebsku.
Klimavu nie dajuć čytać
Administracyja SIZA admoviłasia pryniać litaraturu dla palitviaźnia. Načalnik adździełu pa vychavaŭčaj pracy major Dzianisik paviedamiŭ: knihi možna brać tolki ź biblijateki izalataru. Raniej administracyja SIZA admoviłasia pieradać Klimavu radyjoprymač. Andrej Klimaŭ u SIZA z 3 krasavika. Palityka vinavaciać u zaklikach da hvałtoŭnaha źviaržeńnia ŭłady, nibyta źmieščanych u jaho artykule ŭ internecie.
Statkievič izalavany
Palitviazień Mikoła Statkievič, jaki adbyvaje pakarańnie ŭ vyhladzie abmiežavańnia voli, byŭ izalavany ŭ pamiaškańni kamendatury Puchavickaha rajonu na čas «Čarnobylskaha šlachu». Hetak Statkieviča izalujuć rehularna: padčas praviadzieńnia masavych vuličnych akcyjaŭ ci ŭdziełu Łukašenki ŭ mierapryjemstvach na adkrytym pavietry.
Zatrymali paśla «Šlachu»
Paśla žałobnaha mitynhu byli na karotki čas zatrymanyja specnazam: Jury Šamkałovič, Ludmiła Atakułava, Ivan Śpirin, Kaciaryna Krasnova, Kaciaryna Halickaja, Mikałaj Siarhiejenka, Aleś Lisijenka, Uładzimier Siarhiejeŭ, Viačasłaŭ Viatkoŭski, Valancin Sakałoŭski, Aleś Prenin, Vasil Prasiankoŭ, Kaciaryna Ramaškievič, Julija Siaŭcova, Jury Ziańkovič. Pad haračuju ruku była schoplenaja i 10‑hadovaja dziaŭčynka, jakuju milicyjanty zakinuli ŭ aŭtobus razam z zatrymanymi, a potym adpuścili tolki na vuł.Arłoŭskaj.
Zatrymańni ŭ Viciebsku
Staršyniu viciebskaj abłasnoj supołki Partyi BNF Kastusia Smolikava, kiraŭnika haradzkoj supołki Ŭładzisłava Tokarava i aktyvista Siarhieja Biełazieku specnaz zatrymaŭ na Ŭśpienskaj horcy, dzie pradstaŭniki demsiłaŭ sabralisia ŭšanavać pamiać achviaraŭ Čarnobylu. K.Smolikavu i S.Bielazieku sud daŭ pa 2 bazavyja vieličyni štrafu. U.Tokaraŭ asudžany na 3 nočy aryštu.
Dva mitynhi ŭ Mahilovie
26 krasavika ŭ Mahilovie adbylisia dva mitynhi — aficyjny j apazycyjny. Na aficyjny mitynh sabralisia zbolšaha školniki. Pradstaŭniki mahiloŭskaj abjadnanaj apazycyi ŭskłali kvietki da pamiatnaha znaku la haradzkich mohiłak. Na alternatyŭny mitynh pryjšło sorak čałaviek. Ksiondz Mahiloŭskaha kaściołu śv. Stanisłava a. Raman pravioŭ malebien za Biełaruś. Mitynh skončyŭsia himnam «Mahutny Boža».
Mur naviedaŭ Fińkieviča
Namieśnik ambasadara ZŠA ŭ Biełarusi Džonatan Mur naviedaŭ 26 krasavika aktyvista moładzievaha ruchu Artura Fińkieviča na «chimii» ŭ Mahilovie. Razmova prachodziła ŭ prysutnaści načalnika speckamendatury. Dž.Mur zapeŭniŭ, što ZŠA buduć i dalej patrabavać ad biełaruskich uładaŭ vyzvaleńnia ŭsich palitviaźniaŭ.
27 krasavika
Na miažy zatrymanyja
Na polska‑biełaruskaj miažy byli časova zatrymanyja studenty, što vučacca ŭ Polščy pa prahramie Kalinoŭskaha. U časie mytnaha nahladu ŭ Volhi Šepiel, Aleny Kamarovaj, Viktara Kiśluka, Paŭła Kresika, Alesia Vančuka, Andreja Aksamita j Alaksieja Trubkina adabrali pašparty. A.Trubkin, karystajučysia tym, što mytniki, pakinuŭšy na stale pašparty, vyjšli z kabinetu, uziaŭ svoj pašpart i pajšoŭ. Z astatnimi praviali «prafilaktyčnuju hutarku» ludzi ŭ cyvilnym, jakija nie pradstavilisia. Jany pytali, ci viedajuć studenty, chto ažyćciaŭlaje narkatrafik praz polska‑biełaruskuju miažu i chto vozić vybuchovyja rečy.
29 krasavika
Capiory na schodzie demsiłaŭ
Da homielskaha ofisu AHP, dzie prachodziŭ rehijanalny schod delehataŭ apazycyi, pryjechali milicyja i sapiory. Jany zajavili, što pastupiŭ ananimny syhnał, byccam u dvary domu — snarad, i patrabavali ahladu pamiaškańnia i padvorku. Haspadary nie dazvolili, i milicyjanty źjechali.
