Kamitet AAN pa pravach čałavieka pryznaŭ parušeńni ŭ spravie Uładzisłava Kavalova. Adpaviednaje rašeńnie było pryniata na siesii 29 kastryčnika 2012, paviedamiŭ pravaabaronca Raman Kiślak.
Zvarot rodnych Kavalova byŭ dasłany ŭ Kamitet 14 śniežnia 2011 hoda. Na nastupny dzień jaho zarehistravali. Jak adznačyŭ Raman Kiślak, sprava była razhledžana ŭ rekordnyja terminy — mienš čym za hod. A ŭ historyi Biełarusi jość prykłady, kali spravy razhladalisia amal 10 hod.
Pravaabaronca ahučyŭ šerah pryznanych Kamitetam parušeńniaŭ u časie śledstva i suda pa spravie Uładzisłava Kavalova.
Kamitet pryznaŭ, što ŭ dačynieńni da Kavalova prymianiaŭsia fizičny i psichałahičny cisk z metaj prymusić jaho ahavaryć siabie.Pra heta padsudny zajaviŭ u časie pracesu. Adnak nijakich rasśledavańniaŭ pavodle jaho zajavaŭ praviedziena nie było, adznačajecca ŭ rašeńni.
U Biełarusi adsutničaje praktyka dastaŭki padazravanaha ŭ sud dla pryniacca rašeńnia ab miery strymańnia. Takija funkcyi ŭ nas vykonvaje prakuratura. Upieršyniu Kavaloŭ ubačyŭsia z sudździoj praz 5 miesiacaŭ paśla zatrymańnia. Na dumku Kamiteta, heta nieprymalna.
Toje, što Kavaloŭ u časie sudu ŭvieś čas znachodziŭsia za kratami, źjaŭlaŭsia pierad udzielnikami pracesu ŭ naručnikach, a taksama pavodziny dziaržaŭnaj presy, jakaja da vyniasieńnia prysudu nazvała jaho terarystam, było rasceniena siabrami Kamitetu jak parušeńnie prezumpcyi nievinavataści. Faktyčna, adznačajecca ŭ rašeńni, Kavalovu jašče da zaviaršeńnia sudu stvaryli adpaviedny vobraz.
Sud nad Kavalovym nie byŭ niezaležnym, pryznaje Kamitet. Chadajnictvy jaho advakata adchilalisia biez hruntoŭnaj arhumientacyi, u toj ža čas chadajnictvy abvinavačvańnia zadavalnialisia ŭ poŭnaj miery.
Kavalova sudzili ŭ Viarchoŭnym sudzie, što aŭtamatyčna pazbaŭlała jaho mahčymaści efiektyŭnaha abskardžańnia prysudu.
I heta faktyčna źjaŭlajecca parušeńniem prava na žyćcio. Pryznańnie hetaha parušeńnia Kamitetam — pieršy vypadak u historyi Biełarusi.
Urešcie, aficyjny Minsk admoviŭsia pryznavać budučaje rašeńnie Kamiteta ŭžo na momant rehistracyi zvarotu siamji Kavalova. Nibyta tamu, što zvarot byŭ zarehistravany niapravilna: nie byli vyčarpanyja ŭnutranyja mahčymaści dla abarony i adsutničała davieranaść samoha Kavalova. Pravaabaronca Kiślak tłumačyć, što, pa-pieršaje, nie isnuje pracedury niepryznańnia padobnych rehistracyj, a pa-druhoje, Lubovi Kavalovaj prosta nie dali atrymać davieranaść.
Što aznačaje pryniaćcie padobnaha rašeńnia dla Biełarusi?
Zhodna Mižnarodnaha pakta ab hramadzianskich i palityčnych pravach, padpisanaha našaj krainaj, rašeńnie Kamitetu pa spravie Uładzisłava Kavalova musić być aficyjna apublikavana.Akramia taho, našaj krainie rekamiendujuć prykłaści namahańni, kab padobnyja situacyi nie paŭtaralisia. Siamja Kavalovych maje prava na kampiensacyju za žorstkaje abychodžańnie: sakretnaść vakoł pracedury vyniasieńnia prysudu, niavydača cieła rasstralanaha i tajamnica miesca pachavańnia. Kamitet nastojvaje na admienie sakretnaści vakoł pracedury rasstrełu i pachavańnia asudžanych na śmierć u Biełarusi.
Adnak dziaržava nie abaviazanaja vykonvać rašeńni Kamiteta, heta sprava dobraachvotnaja.
Nahadajem, što 11 krasavika 2011 na stancyi mietro «Kastryčnickaja» spracavała vybuchovaje prystasavańnie. U vyniku 15 čałaviek zahinuli, sotni byli paranienyja. Vinavatymi ŭ terakcie byli pryznanyja Dźmitryj Kanavałaŭ i Uładzisłaŭ Kavaloŭ. Jany byli asudžanyja da rasstrełu i prysudy vykananyja.
«Ja tolki chaču reabilitavać syna ŭ vačach ludziej»
Luboŭ Kavalova pierakananaja, što sapraŭdnych vykanaŭcaŭ teraktu nichto nie šukaŭ i nie šukaje. «Siońnia mohuć luboha pryznačyć na rolu vinavataha i navat rasstralać. Ciapier užo ničoha nie źmieniš. Ja tolki chaču reabilitavać svajho syna ŭ vačach ludziej», — skazała Luboŭ Kavalova.
