Pierachod na jeŭrastandarty ŭ budaŭnictvie ŭ Biełarusi paciahnie dla zabudoŭščykaŭ pavieličeńnie zatrat. Pra heta napres-kanfierencyi 20 listapada zajaviŭ pieršy namieśnik dyrektara ZP «Hierbielinviest» Valeryj Frejtak.
Nahadajem, biełaruskija ŭłady z nastupnaha hoda płanujuć ukaranić jeŭrastandarty ŭ budaŭnictvie.
«My razumiejem, što pierachod na jeŭrastandarty zapatrabuje dadatkovych finansavych zatrat», — skazaŭ jon. «Heta źviazana z tym, što isnuje roźnica pamiž biełaruskimi i jeŭrapiejskimi normami. My heta bačyli na litoŭskich zavodach, na jakich dla nas pradukcyju vyrablali pa adnych standartach, dla Jeŭropy — pa inšych, u ich i supraciŭleńnie ciepłapieradačy vyšejšaje», — adznačyŭ śpiecyjalist.
Pry hetym ekśpiert ličyć, što heta pytańnie źviazana z pakupnickaj zdolnaściu spažyŭcoŭ.«My budujem hałoŭnym čynam žyllo typavych spažyvieckich jakaściaŭ, tamu što razumiejem, što košt pytańnia vysoki», — adznačyŭ Frejtak.
Pavodle jaho mierkavańnia, treba pryniać u peŭny momant rašeńnie: «My idziom na jeŭrapiejskija standarty ź istotnym padaražeńniem, razumiejučy, što płaciežazdolnaść nasielnictva pavialičyłasia, abo zastacca na raniejšych pazicyjach». Pry hetym jon padkreśliŭ, što rašeńnie hetaha pytańnia znachodzicca ŭ kampietencyi Ministerstva architektury i budaŭnictva.
