Ludzi, jakija lačylisia abo lečacca ad raku, i majuć chraničnuju stomlenaść, vyklikanuju nastupstvami chvaroby i lačeńnia, mohuć pavysić svaju enierhiju z dapamohaj rehularnaj chadźby abo jazdy na rovary.
Takuju navinu pryniesła ahienctva Reuters sa spasyłkaj na vyniki 38 kliničnych ekśpierymentaŭ, u jakich brali ŭdzieł ahułam bolš za 2600 chvorych.
Doŭhaterminovaje pačućcio stomlenaści ŭ ankałahičnych chvorych moža być vyklikana jak samoj chvarobaj i źviazanymi ź joj praciahłymi bolami, tak i nastupstvami chimijaterapii. Raniejšyja daśledavańni śviedčyli, što ŭ takoj situacyi mohuć dapamahčy zbałansavanaje charčavańnie i akupunktura.
Adnak vyniki novych ekśpierymentaŭ pakazvajuć, što jość i inšyja dziejsnyja srodki. Ich vyhoda ŭ tym, što chvoryja mohuć źviartacca da ich ŭ volny čas.
Adna z aŭtaraŭ daśledavańnia, doktar Fijona Kramp z Univiersiteta Zachodniaj Anhlii ŭ Brystali, paviedamiła što ŭdzieł u ekśpierymiencie brali roznyja chvoryja, ale pieravažali žančyny z rakam małočnaj załozy. Fizičnaja aktyŭnaść, jakuju prapanoŭvali ŭdzielnikam ekśpierymienta, varyjavałasia ad chadźby i jazdy na rovary, da bolš surjoznych fizičnych nahruzak i johi. Častata nahruzak taksama była roznaju — ad dvuch razoŭ na tydzień da štodzionnych trenirovak. Čas nahruzki — ad 10 chvilin da dźviuch hadzin.
Kali vyniki ekśpierymienta byli padsumavanyja, akazałasia, što najlepšyja vyniki mieli tyja chvoryja, jakija rehularna chadzili abo jeździli na rovary. Mienavita jany adčuli, što ŭ ciele im prybaviłasia enierhii i siły.
