Dala Hrybaŭskajcie nie maje namieru zajmacca śpiekulacyjami na temu ab tym, kamu moža być vyhadny napad na litoŭskaje pasolstva ŭ Minsku. Pra heta prezident Litvy zajaviła žurnalistam u Kaŭnasie 9 listapada, paviedamlaje ahienctva BNS.
«Zajmajciesia śpiekulacyjami sami, heta vaša sprava, a nie maja, — skazała Hrybaŭskajcie žurnalistam. — Hety vypad užo acenieny jak samimi biełarusami, tak i litoŭskim bokam. My nakiravali hetaj krainie notu, a papiaredniaje rasśledavańnie ažyćciaŭlaje sama Biełaruś».
U svaju čarhu litoŭski pasoł u Biełarusi Linas Linkiavičus, jaki zaraz znachodzicca ŭ Litvie, vykazaŭ nadzieju, što pravaachoŭnyja orhany Biełarusi naležnym čynam rasśledujuć incydent.
«Pavodle zakonu, rasśledavańniem incydentaŭ takoha rodu zajmajucca miascovyja pravaachoŭnyja orhany ŭ adpaviednaści z zakonami hetaj krainy. My dali im takuju mahčymaść. Spadziajemsia, što jany naležnym čynam rasśledujuć incydent, a taksama spadziajemsia na naležnaje zabieśpiačeńnie achovy dypłamatyčnych pradstaŭnictvaŭ, što i nieabchodna zrabić na padstavie Vienskaj kanviencyi ab dypłamatyčnych znosinach», — skazaŭ pasoł.
Pry hetym jon adznačyŭ, što pasolstva Litvy nie padtrymlivaje z pravaachoŭnymi orhanami Biełarusi pastajannaj suviazi z nahody incydentu. «U nas praktyčna kantakt byŭ adzin raz, u samym pačatku paśla hetaj padziei, i my nie majem aficyjnaj infarmacyjaj pra chod śledstva. Nie dumaju, što my pavinny jaje atrymlivać, jany nie pavinny pierad nami rabić spravazdaču za kožny krok. Viedaju tolki, što rasśledavańnie idzie, byli i aficyjnyja zajavy. Akramia taho, jość zajava Ministerstva zamiežnych spraŭ (Biełarusi. — BiełaPAN.), u jakoj vykazvajecca škadavańnie i zapeŭnieńni ŭ tym, što vinavatyja buduć pakaranyja. Dumaju, tak i pavinna być», — skazaŭ Linkiavičus.
Pavodle jaho słoŭ, «naŭrad ci možna čakać karyści» ad zapisu z kamier vonkavaha nazirańnia, bo ŭsio adbyvałasia ŭ ciomny čas sutak.
