U Žodzinskaj turmie № 8, kudy, pavodle papiarednich mierkavańniaŭ pravaabaroncaŭ, mohuć pryvieźci dla adbyćcia pakarańnia lidara «Maładoha frontu» Źmitra Daškieviča, nie dali źviestak, ci dastaŭleny tudy taki asudžany. Toje samaje i ŭ Hrodnie.
Niaviesta palitviaźnia Nasta Pałažanka 2 listapada, znoŭ budzie sprabavać daviedacca, dzie Źmicier. Nasta spadziajecca i na listy ad Źmitra, adpraŭlenyja pierad etapam z Mazyrskaj kałonii. Što takija listy jość, joj dakładna viadoma:
«Ja kali zachodziła padpisvać papieru ŭ kancylaryju, a tam znachodzicca i cenzarskaja, to bačyła, što ad jaho jość try listy — jany lažali na stale, i pry mnie ich pieraviarnuli, kab nie pračytała. Moža, tam što napisaŭ, kudy jaho nakirujuć».
Spačatku 2 hady źniavoleńnia za nibyta złosnaje chulihanstva Źmicier Daškievič adbyvaŭ u kałonii ŭ Horkach. Hod tamu z Horak Daškieviča pieraviali ŭ Hłybockuju kałoniju, dzie znoŭ sudzili jak złosnaha parušalnika režymu i dadali jašče hod kałonii. Adbyvać novy termin palitviaźnia adpravili ŭ Mazyrskuju kałoniju, adkul 30 kastryčnika vyrašyli etapavać u «krytuju» turmu. U jakuju turmu trapić Źmicier Daškievič, dahetul nieviadoma.
