Alaksandr Milinkievič pieraabrany na pasadu staršyni ruchu «Za Svabodu» Takoje rašeńnie pryniata 20 kastryčnika praktyčna adnahałosna (75 — za, adzin ustrymaŭsia) delehatami treciajspravazdačna-vybarnaj kanfierencyi arhanizacyi ŭ Minsku.
Milinkievič byŭ adzinym kandydatam na pasadu staršyni. Jak zaznačyŭ pry vyłučeńni jaho kandydatury namieśnik staršyni ruchu Juryj Hubarevič, mienavita Alaksandr Milinkievič «zastajecca abliččam sučasnaj demakratyčnaj Biełarusi». «My pavinny zachavać lidarstva ŭ arhanizacyi, što dazvolić ruchu ŭ dalejšym dziejničać bolš paśpiachova», — skazaŭ palityk.
Paśla pracedury hałasavańnia Milinkievič zajaviŭ, što čakaŭ svajho vybrańnia. «Abiacaju nie być staršynioj biaskonca, zaraz pastarajusia pracavać jašče lepš», — skazaŭ jon.
Na kanfierencyi taksama pryniaty papraŭki ŭ statut, jakija ŭvodziać pasadu pieršaha namieśnika staršyni. Jak zaznačyŭ Milinkievič, staršynia ŭ značnaj stupieni vykonvaje pradstaŭnickija funkcyi. «Ale niechta ž pavinien zajmacca niepasredna pracaj, heta pavinien być druhi čałaviek u ruchu — pieršy namieśnik staršyni. Aprača taho, ruch pašyraje svaju dziejnaść, realizujucca novyja prahramy. Pracy chopić i na pieršaha namieśnika, i na dvuch zvyčajnych», — skazaŭ lidar arhanizacyi.
Svaich namieśnikaŭ Milinkievič prapanavaŭ asabista, alternatyŭnyja kandydatury nie vyłučalisia.
Pieršym namieśnikam staršyni vybrany Juryj Hubarevič, jakoha Milinkievič nazvaŭ «kłasnym mieniedžaram».«Jon moh by dobra arhanizoŭvać pracu, kaardynavać kirunki dziejnaści i vykanańnie rašeńniaŭ», — skazaŭ Milinkievič.
Namieśnikami staršyni stali Aleś Łahviniec i Halina Skarachod.Jak zaznačyŭ Milinkievič, Łahviniec «dušu i serca addavaŭ ruchu, byŭ jaho vydatnym pradstaŭnikom na mižnarodnaj arenie», a Skarachod — «adkazny i ŭpłyvovy čałaviek, dobra viadomy ŭ trecim siektary».
