Akute: Biełaruskaja mova — heta kachańnie, seks i rok-n-roł 13

3 listapada ŭ kłubie Re:Public adbudziecca vialiki solny kancert Akute. Hety hurt litaralna za hod staŭ samaj papularnaj biełaruskamoŭnaj kamandaj u krainie.

My sustrakajemsia z udzielnikami Akute, Stasam Mytnikam i Ramanam Žyharavym, u adnoj ź minskich kaviarniaŭ. Mahiloŭcy zavitali ŭ Minsk, kab sustrecca z žurnalistami — tamu hrafik vielmi ščylny, i bačna, što muzyki stamilisia.

«Samaje papularnaje pytańnie, jakoje nam zadajuć. — kaža vakalist i hitaryst Stas Mytnik. — «Čamu vy śpiavajecie pa-biełarusku?». Pa-pieršaje, dziŭna, kali ŭ biełarusa pra heta pytajucca.

A toje, što pytańnie zadajuć pa-biełarusku, heta jašče i śmiešna, hučyć amal jak «ty što, durny?».

Abodva albomy Akute trapili ŭ TOPy samych pradavanych i samych papularnych biełaruskich dyskaŭ. Mahiloŭskamu trya ŭdałosia toje, što jašče z dva hady tamu, ličyłasia amal nievierahodnym — jany stvaryli papularny biełaruskamoŭny hurt, čyje pieśni lubiać, viedajuć i śpiavajuć usie: ad dziaŭčyn-školnic da ofisnych supracoŭnikaŭ.

«My prosta robim toje, što nam padabajecca. Ciapier užo možna skazać, što kali heta padabajecca takoj kolkaści ludziej u Biełarusi, značycca my na pravilnym šlachu».

Niadaŭna Akute stupili na razahrevie ŭ lehiendarnych brytanskich rokieraŭ Placebo, pry čym niekatoryja hledačy pryjšli na kancert kab pasłuchać biełaruski hurt.

«Vielmi pryjemna, kali tak jano jość. Čamu b biełarusam nie słuchać biełaruskuju muzyku na biełaruskaj movie, navat niahledziačy na pieraškodu ŭ vyhladzie Placebo». — žartuje Raman Žyharaŭ.

Zaraz hurt płanuje vypuścić sinhł «Ihołki». Pra novy paŭnavartasny albom kazać rana.

«U Biełarusi muzykam treba jak maha bolš pracavać,

my taksama muzykaj nie zarablajem — u nas va ŭsich jość pracy

, ale z časam, spadziajemsia, zmožam zarablać mienavita jak muzykanty. — kaža spadar Mytnik. — Chaciełasia b, kab u Biełarusi źjaŭlalisia biełaruskamoŭnyja hurty. Bo my hladzieli na rejtynh Experty.by, my ledź nie adziny biełaruskamoŭny hurt, jaki trapiŭ u TOP za paŭhoda.

A śpiavać pa-biełarusku heta prosta i pryjemna,

biełaruskaja mova — heta sapraŭdnaje kachańnie, seks i rok-n-roł.

I chaciełasia b, kab źjaviŭsia šou-biznes, jaki, naprykład, va Ukrainie isnuje,

dzie za jakasna zrobleny pradukt možna atrymać prybytak. U nas jano tolki pačynajecca, my apłočvajem svaje zapisy samastojna».

Što tyčycca «čornych śpisaŭ», jakija isnujuć u krainie, to Akute nie bajacca trapić tudy.

«My nie bačym padstavaŭ, kab nas tudy ŭklučyli. — kaža spadar Žyharaŭ. — Adnak tudy možna trapić i biez usialakich padstavaŭ. Nie za biełaruskuju movu ž nam tudy traplać?»

Ciapier hurt rychtuje prahramu dla minskaha kancerta — u minuły raz, jany adyhrali całkam abodva albomy i navat toje, što na ich nie trapiła.

«Jašče zastalisia pieśni, jakija my nikoli nie vykonvali ŭ Minsku — jany na kancercie 3 listapada i prahučać».

Kancert hurtu Akute projdzie 3 listapada ŭ kłubie Re:public (Prytyckaha, 62). Pačatak, a 19.00.

Juraś Uskoŭ, fota Budzma.org

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH